Nola kontsumitzen dute xiberotarrek? Galdera horri arrapostua eman dio CCI Baionako Merkataritza eta Industria Ganbarako ikerketa batek, Xiberoako merkatarien eskariz. Urtean 57 milioi euroko salmentak izan ohi dira Xiberoako saltegietan, eta erosketen %55 elikadura sailean dira. Ikerketaren arabera, geroz eta erosle biarnes gehiago daude Xiberoan, eta internet bidezko salmenta kopurua emendatu egin da. Haatik, xiberotar merkatariek ohartarazi dutenez, azken urteen irabazi marjina ttipitu egin zaie.

Laborariak taldeko ehun bat kide Kanboko kontseiluan sartu dira barda, Marieniako proiektua salatzeko beste behin ere. Bi oren luzez arrabotsa egiten aritu dira, makil eta zintzarriekin Christian Devèze auzapezak kontseilua gelditzea agindu duen arte. Gelatik ateratzean pusaka hasi dira, laborariak, hautetsiak nahiz poliziak, eta auzapeza erori da. Ez da beraz eztabaida posiblerik izan. Egin duen erorikoaren ondotik, auzapeza ospitalera eramana izan da. «Hautetsi baten kontrako talde erasoa» ikusi du Bainoako prokuradoreak, eta ikerketa bat abiatu duela adierazi du.

«Etudes de Sociolinguistique au Pays Basque» liburua argitaratu berri du Eguzki Urteaga soziologoak L’Harmattan argitaletxearekin. Hizkuntzaren egoera zertan den aztertzen du Euskal Herriko hiru lurralde administratiboetan, hots, Ipar Euskal Herrian, Euskal Autonomi Erkidegoan eta Nafarroan.

Biarnoko 2000 langaberekin urte betez esperimentatu ondoan, Iparraldean ezarriko dute ere langabeendako «gutxieneko diru sartze baldintzatua». 600 euroko gutxieneko diru sartzea eskuratzeko, astean hamabost oreneko aktibitate bat justifikatu beharko dute hartzaileek, izan elkarte, ikastaro edo tailer batean parte hartuz. Departamenduaren arabera, Biarnoan esperimentazioa hasi denetik, lagunduen kasik %40 lanera itzuli dira. Aurten Hendaia, Donibane Lohizune, Uztaritze eta Kanbora hedatu dute. 15.000 pertsonek eskuratzen dute RSA departamenduan.