Pilotak Aldudeko ibarraren ukan duen inportantzia estakuru harturik, ibarraren azken hiru mendeak kondatzen dituen dokumentala ekoizten ari da Aldudarrak elkarteak. ‘Perkainen itzalean’ izenburua hautatu dute, Juan Martin Inda ‘Perkain’ pilotari handiaren oroimenez. Ibarreko adineko herritarren ahozko lekukotasunak, argazki zaharrak eta artxibategietako agiriak biltzen dihardute. Urte baten buruan estreinatuko dute Aldude ibarreko ate irekietan. Aldudarrak elkarteko Mikel Erramuzpe izan da Goiz Berri saioko gomita.