Ostegunean zendu da Mixel Itzaina, euskal kulturaren eta bertsolaritzaren sustatzaile nekaezina, 92 urte zituela. Publikoki bertsotan gutxitan aritu bazen ere, bizitza osoa eman zuen bertsolaritzaren alde lanean, Ipar Euskal Herrian. Gai jartzaile eta epaile gisa nabarmendu zen, eta Herria zein Gure Herria aldizkarietan ere idatzi zuen. 1966an Ezpeletan antolatu ziren Pertsulari solas izeneko topaketetan parte hartu zuen, eta 1980an, bertsolaritzaren gainbehera ikusita, Bertsularien Lagunak elkartea sortu zuen Ernest Alkhatekin batera. Jean Louis Hariñordoki ‘Laka’-ren hitzetan, “errespetu handiko eta laguntzaile isila” zen. Gainera, bertsolaritzaren eta hezkuntzaren arteko zubiak eraiki zituen, eta Hegoaldeko bertsolariak Iparraldera ekartzen lehenetarikoa izan zen. Epaile lanetan ere jardun zuen urte luzez Nafarroako eta Euskal Herriko txapelketetan. Beñat Soule eta Panpi Etxegoinekin batera aritu zen maiz, laguntasun estuan. Itzaina idazle ere izan zen: Xalbador eta Mixel Labeguerieren biografiak argitaratu zituen, eta itzultzaile lanak ere egin zituen. Euskaltzain urgazle izendatu zuten 1967an, eta ohorezko euskaltzain 2014an. Ehorzketak astelehenean izanen dira Itsasuko elizan, 17:00etan. Bitartean, Kanboko beilatokian egin daiteke bisita.

Txuri urdinez jantzi da Baiona. Hitzordu historikoa dela aste guzian aipatzen ari gira. Berri txarretan, Tuilagi zentroa eta Tatafu harroina kolpatuak dira. Baina, Arthur Iturria kapitaina eta Camille Lopez xiberotar zabaltzaileak Brennus erredola jada altxatu zuten Clermontekin preseski 2017an. Arthur Iturriak erran digunaz oroitzapen ona da baina orain garrantzitsua da mementoa elkarrekin bizitzea. Guillaume Rouet hazpandar erdilariak erakusten du aiherkunderik ez duela bere zuzendarien kontra. 22 urte Baionan pasa ondotik, Avironek erabaki zuen ez atxikitzea heldu den sasoiari begira. Joan den astean, Toulonen kontra entsegua ere markatu zuen. Azken aldiz ariko da Jean Dauger zelaian. 36 urte ditu eta Nizan jokatuko du heldu den denboraldian. Zelai gainean itxura bereko jokoa dutela Avironek eta Clermontek erran daiteke Facundo Bosch aztalkariak dion bezala. Astea laburra izan dela aitortu digu Grégory Patat trebatzaileak. Baina lasaitasunean prestatu ahal izan dutela hitzordua gehitu du. Osaketaz mintzatzeko, hain segurraz ere hasiko dira Cormenier Bosch eta Tagi lehen lerroan. Iturria kapitaina eta Moon bigarrenean. Hirugarren lerroan Chouzenoux, Cassiem eta Bruni. Rouet erdilari eta Segonds zabaltzaile. Hegaletan Spring eta Carreras. Zentroan Mori eta Makala eta 15 zenbakiarekin Tiberghien.

Aeronautika alorrean ari den Lauak enpresak jakinarazi du bere kapitalaren %51 Indiako Wipro multinazionalari saldu diola. Ekainaren 12an langileei eginiko agerraldi batean eman dute berri hau, Hazparnen sortua izan zen enpresa 1995ean Jean-Marc Charrittonen eskutik. Salmenta hau Lauak taldearen etorkizuneko segurtasuna eta garapena bermatzeko egin dutela argitu dute zuzendaritzatik. Gutun baten bidez, Mikel Charritton gaur egungo zuzendariak adierazi du orain arteko familia-jabetzak eta enpresaren zorpetzeak ez zutela uzten teknologia berrietan edo kanpoko garapenetan behar diren inbertsioak egiten. Horregatik hautatu dute nazioarteko bazkide sendo baten sarraraztea. Wipro, Hego Indian egoitza duen teknologia konpainia handi bat da, eta orain Lauak taldeko akziodun nagusia bilakatuko da. Hala ere, Mikel Charrittonek bere karguan segituko du eta enpresaren gidaritza bermatua izanen dela erran du. Langileei bidalitako gutunean, zuzendaritzak azpimarratu du salmenta honek ez duela eraginik izanen lanpostuetan ez eta langileen baldintzetan ere. Hitzarmen kolektiboa eta eguneroko lan baldintzak berdin segituko dute. Salmenta honen iragarpena Le Bourget-eko Aeronautikako eta Espazioko Azoka Nazioartekoaren aitzin egin da, ekainaren 16an irekiko dena. Horren karietara, komunikazio ofiziala aurkeztuko dute odnoko egunetan. “Badakit etapa bat bururatzen ari dela, eta beste bat irekitzen. Baina gure helburua bera da: Lauak indartzea eta mundu mailako lehian segitzea”, azaldu du Mikel Charrittonek.

Hitzordu historikoa ostiral arrats huntan Jean Dauger errugbi zelaian. 33 urte berantago lehen mailako final-laurden bat jokatuko du Baionak ostiral honetan. TOP14 txapelketako playoffeko partida jokatuko du Baionak bere zelaian Clermonten kontra. Irabazlea Tolosari lehiatuko zaio finalerdien karietara. 1992an, final-laurdena galdu zuen Serge Blancoren Biarritz Olympique taldearen kontra, puntu batez. Orduan errugbia amaturra zen. Eta urte batzuk berantago profesionala bilakatu zen. Baiona eta Clermonten arteko kanporaketa ostiral arrats honetan 21:00etan Jean Dauger zelaian. Irabazlea Tolosari lehiatuko zaio finalerdien karietara. Jakin 35 metro karratuko pantaila handi baten ezartzeko deliberoa hartu duela Jean René Etxegarai Baionako auzapezak ostiral honetan, Hau Roland Barthes zelaigunean.