Pilotan, berezkoetara igaiteko Pro-Am txapelketa aitzin, polemika izan zen. Christophe Cigarroa eta Nicolas Dufau amateurren lehen mailako Euskal Herriko finalista eta Frantziako finalista ez baitziren hautatuak izan Pro-Am horren jokatzeko. Haatik bi txapelketen finalerdietan gelditu ziren Julen Mariluz eta Unai Etxeberri bai. Teillery-Lazkano eta Barrenetxe-Etxegoinekin batean lehiatu ziren Pro-Am txapelgoan. Bukaeran, Teillery-Lazkano nagusitu ziren eta berezko bilakatu. Ondotik abiatu zen berezkoen binakako txapelketa. Zauri ainitzengatik, Julen Mariluz eta Unai Etxeberri amateurrak deitu zituzten ordezko gisa aritzeko. Julen Mariluz eta Ximun Lambertek multzoko lehen tokia lortu zuten B mailan. Ondorioz, A mailako final-laurdenean lehiatuko dira larunbatean Arrangoitzen Iker Espinal eta Luis Sanchez nafarren aurka.

Baionako 562. Xingar feria ospatu da ostegun honetan. Amélie Etxepare urepeldarraren 14 kiloko xingarrak eraman du urrezko domina, hemezortzi hilabetez idortzen egon ondotik. Enkanteetan 2.700 eurotan saldu dute. Aurkezpen ederrenaren saria eskuratu zuen iaz laborari urepeldarrak. Lehen aldiko jaso du txapela eta biziki harritua eta alegera agertu zen. Ipar Euskal Herriko 25 xingar lehiatu dira Ezpeleta, Itsasu, Mehaine, Hazparne edo Urruña herrietatik ekarriak. Denak etxean eginak, gehienak familian, aspaldiko ohidura bati segituz. Ostegun goizean epaileak, xingarrak barnetik usaintzen ibili dira, zaldi hezur bati esker, xingarra moztu gabe. Amélie Etxepareren 14,3 gramoko xingarra izan da onena epaileen arabera. Bigarren lekuan, emaitza berarekin, Thomas Latour baionarra eta Pascal Membrède tarnostarra gelditu dira; eta hirugarren lekuan, Daniel Tailleur biarnesa.

Azken urteetan blokeaturik zen EEP Euskararen Erakunde Publikoaren aitzinkontuari diru gehiago ematearen alde agertu zen Frantziako Hezkuntza Ministeritza. Laster hori defendatuko duela ministeritza guzien arteko bilkuran erran die EEPko hautetsiei baita hemengo hiru senatariei eta hiru diputatuei ere ostegun huntan iragan zen bilkuran Parisen. Horrez gain, irakaskuntza mailan aitortu zuen brebetako zientziak euskaraz bakarrik Seaskako ikasleei mugatzeak ez zuela zentzurik. Arauak aldatuko dituela beste sail elebidunei orokortzeko erran zuen. Baxoari dagokionez, konplikatuago ikusten zuen berehala aldatzeko baina landu nahi duela erakutsi die hemengo ordezkariei ministeritzak. Azkenik, hirialdean, elebidunaren irakaskuntza zabaldu behar dela ere azpimarratu zuten ministeritzatik.

EGI Euzkadi Gaztedi, EAJko gazte taldea Hego Euskal Herrian jadanik plantan bada ere, Ipar Euskal Herrian talde baten sortzeko nahia agertu zaie. Iparraldeko gazte problematikei eta ideien partekatzeko xedea dute. Lurralde honetan engaiatu nahi duten gazteentzat zuzendua dela diote kideek. Arlo ezberdinak tratatzeko nahia dute, hala nola, lurralde erresiliente eta berriztagarri baten sustatzea, izan dadin, ekonomikoki edota sozialki eta ingurumenari lotutako gogoetak egitea. Bestalde, gazteak Euskal herrian lan egiteko eta bizi daitezen beharraz eta euskararen erabilpenez ere solastatu nahi dute. Talde berriaren aurkezteko eta ofizializatzeko, Baionako Moma jatetxean egun bat antolatzen dute EGIko kideek. Bertan, 11ak eta 30tan mahai inguru bat izanen da Herrigintza eta instituzioetatik haratago gaia hartuz, Aitor Esteban EBBko buruak, Peio Etxeleku Ipar Buru Batzarreko buru ohiak eta eta Aitana Agirre Europako hauteskundeetako hautagai ohiak emanik. Ondotik, besta egiteko parada izanen da.