Xiberoa eta Amikuzetik harago, L'Outil en Main elkartea Errobi eskualdera hedatu da. Bederatzi urteko gazteak eskulanetan eta arte lanbideetan iniziatzea da elkarte horren helburua. Iniziazio hori zinezko tailerretan egiten da, benetako lanabesekin. Erretreta hartua duten artisau bolondresek gidatzen dituzte ikastaroak gehienetan. Tailerretan parte hartzen duten gazteek hainbat lanbide aurkitzen dituzte urtean zehar, eta beren obrak sortzen dituzte. Ikastaroen artean, besteak beste, zurgintza, baratzezaintza, arte sorkuntzak, elektrizitate lanak edota sukaldaritza aipa daiteke. Errobiko lurraldean izen-emateak ireki dituzte eta lehen saioa urriaren lehenean eginen dute Luhusoko Urxuria gelan.