Tuberkulosiagatik beren behiak ehaiteko protokoloari uko egin zioten hamahiru hazle xiberotarrak entzun ditu Pirinio Atlantikoetako prefetak. Laborariek salatu zutenez, protokoloak mila kabala osasuntsuren ehaite «zentzugabea» agintzen zuen. Giroa lasaitzeko Irabarne herrian bilkura publikoa egin dute laborariek eta ordezkari politikoek, Iparralde osoko berrehun herritar eta hautetsiren presentziarekin. Hainbat auzapezen eta Iñaki Etxaniz laugarren hautesbarrutiko diputatuaren babesa jaso dute ere behi hazleek. Prefetak laborariak eta bertaratuak lasaitu nahi izan ditu, eta etxaldeetako kabala ororen hiltzea saihesteko ekintza plan bat landuko dutela jakinarazi du. Horretarako, hori bai, kabalen «ehaite selektibo azkartu» bat proposatu du. Ondoko egunetan zehaztasun gehiagoren berri emanen duela hitzeman du prefetak.