Amiamoko edo zikoina xuri eta miru beltz gehiago zenbatzen ditu LPO hegaztien babeserako elkarteak. Badu 46 urte txori zenbaketak egiten dituztela Organbidexkan, Larraine gainealdean. Kontaketak uztailaren 15an hasten dituzte eta azaroaren 15an bukatzen baina uztailaren 15etik agorrilaren 15a arte, miru beltzak pasatzen dira eta ondotik, azaroa arte zapelatz liztor jaleak dira pasatzen. Iaz, 25.000 miru beltz pasa ziren eta aurten 33.000 pasa dira. Amiamoko xurien kasuan, iaz 1.629 eta aurten jadanik 1.380 zenbatu dituzte. Hala ere, aldaketa klimatikoaren eraginak sentitzen dira, txori ttipi geroz eta gutiago agertzen dira. Hegazti harrapariak, babestuak dira Organbidexkan 1972ko legeari esker.

Aurten, EH Baik errezibituko ditu Région et Peuples Solidaires Frantziar estatuko mugimendu independentista eta autonomistak batzen dituen alderdiaren 29. Udako Unibertsitateak. François Alfonsi, Meritxell Serret, Igor Zulaika edo Anaiz Funosas entzuten ahalko dira egun hauetan. Bake prozesuak aipatuko dira Korsika, Katalunia eta Euskal Herriko adibidearekin, edota hizkuntza ttikituen egoera Europan Peio Jrajuria eta Paul Molacen parte hartzearekin. Abuztuaren 23an hasiko dira eta 25ra arte iraganen dira Baionako Bernat Etxepare lizeoan.

Maddi Kintanak Baiona, Angelu eta Miarritzeko gazteen euskara aztertu du bere tesian. Hitz berriak sortzen dituzte baina baita hitzak beste hizkuntzetatik hartzen ere, besteak beste, interneten eraginez. Maddi Kintanak aurkeztutako tesiak Alex Artzelusek mugaldeko hizkerei buruz egindako lanak berresten ditu: orain arte, helduenen artean euskalki bera partekatzen bazuten, adibidez, Luzaiden, Arnegin eta Garazin, gaur egun muga politikoa muga linguistiko bihurtzen ari da. Hortaz, bi hizkera ezberdin bereizten ari badira, beste nonbaitetik ere elikatuak dira: internetetik. Maddi Kintanak egindako ikerketak hori erakusten du behintzat. Ingelesa anitz entzun daiteke, baina frantsesaren eragina azkarrena da. Etorkizunean, bere tesiaren gaia Lapurdiko kostalde osora zabaltzeko xedea du.

Baratzezainek uzta aski txarra izan dute bereziki tomateetan. Aurtengo aroa nahasia izan da, eta baratzezain zenbaitzuk zailtasunak pairatu dituzte. Xomorroen presentzia, hezetasuna, joan den negu goxoa, udaberri biziki hotza... Hainbat faktoreengatik harrak eta eritasuna plantatu da izan tomateetan, lursagarretan eta tipuletan. Horrek lan zama emendatu die ekoizpenaren salbatzen saiatzeko.

Angeluko Genêts futbol taldeko mutikoek dute Ipar Euskal Herriko maila gorena aurten. Joan den ekainean, Nationale 3tik 2ra igan ziren eta joan den larunbatean txapelketa berdinketa batekin abiatu zuten Angulemaren kontra. Helburu nagusia dute maila horretan egonkortzea taldea, mantentzea egin ahala fite erdietsiz. 28 jokalari ari dira, kasik denak amaturrak. Jada Ligue 1 mailan ari izan diren Toulon, Cannes edo Istres bezalako talde gotorren kontra lehiatuko dira Angeluarrak. Bidaia luze ainitz ukanen dute aurten. Horrek du aintzinkontu orokorra gehien bat emendatu aurtengo. Larunbatean, Fréjus-St Rafaelen zelaian jokatuko dute Genêteko futbolariek.

Mixel Esteban irakasle eta historialariak bere tesia aurkeztu berri du Ipar Euskal Herriko juduen tratamenduaz bigarren mundu gerlan, zazpi urteko ikerketaren ondotik. Ikerketa zailak, garaiko artxibo gehienak, 1944an desagertu baitziren okupazioa amaitzean. Hortaz, dokumentuak bilatzen ibili da Parisen, Berlinen eta Israelen. Atzemandako dokumentuen arabera, orotara hiru sarekada eta 125 pertsona deportatu izan ziren, denak Baionako geltokitik kontzentrazio esparruetara eramanak 1942 eta 1944 artean.

Esperantza azken mementora arte atxiki badute ere, playoffetara ez ziren sailkatu Lapurtar arraunlariak 13 estropada jokatu dituzte uda honetan, KAE1 ligan edo bigarren mailan. Azken hiruak, joan den astean, 4 egun barne. 12-etarik 5garren bukatu dute txapelketa. Baina, iaz lortu bazuten playoffetara sailkatzea, aurten ez dute hirugarren lekua erdietsi. Denboraldia arras bururatu aitzin, Kontxa lehiaketa ospetsuan parte hartzeko kanporaketa jokatuko dute heldu den astean Lapurtarrek. Bestalde, emazteetan, jakin, Donostiako Arraun Lagunak taldeak irabazi duela Euskotren edo goi mailako liga. Talde horretan ari da Maider Bereau Senpertarra.

Baionako Ingurumen Auzitegiak Gatika (Bizkaian) eta Cubnezais (Girondan) arteko goi tentsioko linearen obrak lau hilabetez gelditzea erabaki du. Proiektua Frantziako eta Espaniako elektrizitate garraio sareek dute aintza eramaten, 400 kilometroko kable handi bat itsaso azpitik pasatzea da xedea. Baina hainbat elkarteek proiektu horren kontra egin dute itsas azpiko ugaztunak kaltetuko dituela salatuz. Horren ondorioz, Baionako Ingurumen Auzitegiak erabaki du 4 hilabetez Landetako eta Pirinio Atlantikoetako Departamenduan obren gelditzea eta Frantziako RTE elektrizitate garraioaren sareak ikerketa bat egin beharko du ingurumen eragina aztertu dezan; aldiz, Bizkaian obrek aitzina segitzen dute. Orotara proiektu horrek 2.850 milioi euro kostako ditu.

Urruñan, Tokiko laborantza iraunkor batetik datozen ekoizpenekin lan eginen duen sukalde zentrala eraikitzeko obrak iraila eta urria artean abiatuko ditu Urruñako herriko etxeak. Eraikin berria hiri barneko haur eskolaren eremuan kokatuko da eta paraleloki herriko baratzezaintza proiektua abiatuko dute herriko etxetik. Proiektuaren kostu orokorra 2,7 milioi eurokoa izatea aurreikusten dute Marie Christine Elizondo Urruñako hirigintzarako auzapez-ordeak azaldu digunez.