Herria astekariak adin ederra du. 2024ko urrian bete zituen 80 urteak. Lehen alea 1944an agertu zen Eskualduna astekariaren ondorengo gisa. Hurbileko hedabidea, berrogei laguntzailerekin argitaratzen da ostegun oroz. Astero 30 herriren berriak emanez eta tokiko euskalkiak baliatuz. Gaur egun 1.600 harpidedunekin, beste erronka batzuk ditu, hala nola, sare sozialetan eta sarean oro har bere lekua egitea. Azken aldian, Bada gazte hedabidearekin elkarlanean ari da bere irakurlegoa gaztetzeko xedez. Gaur egun bi langile ditu. Menane Oxandabaratzen lekukoa hartu berri du Ainhoa Etxenike gazteak, aldizkariko erredaktore buru gisa.

'Aroztegia gelditu' plataformak hainbat aurkezpen eskaini ditu Ipar Euskal Herrian gaindi, iragan asteburuan. Baztan ibarreko Aroztegiako laborantza lurretan, 228 luxuzko etxebizitza, hotel bat eta golf zelai bat eraikitzeko egitasmoa geldiarazteagatik, zazpi baztandar auziperatu dituzte; 20 urteko espetxe zigorra eta 56.000 euroko isuna galdegiten dute haien kontra. Horrez gain, bi kazetariri 1.200 euroko isuna galdegiten diete protestaren segipena egiteagatik. Haien auzia ezagutzera emateko aurkezpenak egin dituzte iragan asteburuan Hendaian, Atharratzen eta Itsasun, eta elkartasun gaualdia antolatu dute larunbatarekin, Donaixtin. Larunbateko mintzaldira jende andana hurbildu da, eta Marieniako laborantza lurren aldeko kideek ere hartu dute parte. Iluntzean kontzertuek hartu dute gaina. Otsailaren lehenean manifestaldi nazionala deitu dute Aroztegiako auzipetuen sustenguz, eta Ipar Euskal Herritik autobusa antolatu dute Larzabaletik.

Israelgo Gobernuak gaur egingo du su eten akordioaren inguruko bozketa. Asteazkenen honetan Israel eta Gazako autoritateen su etenaren akordioaren adospena izanen zela uste genuen baina oraino negoziaketetan dira. Akordioaren xehetasunak aldatzen saiatzea leporatu dio Benjamin Netanyahu Israelgo presidenteak palestinarrei. Akordio hau hiru fasetan zatitua da eta fase bakoitzak 42 egun iraun beharko lituzke. Lehenik, lehen fasean, lurreko borroka guziak gelditu beharko dira, nahiz eta Israelek aire bidez segitzen ahalko duen. Bigarren fasean, mota orotako erasoak gelditu beharko dira eta azkenik, Gaza nola berreraiki beharko den eztabaidatuko da. Hala ere, bonbardaketek segitzen dute atzo adibidez 73 palestinarrek bizia galdu dute.

Esku huskan, Lau Herriko parea eta Denek Batekoa, lehian. Irabazlea berezkoen mailara iganen da igande arratsean. Amateurren A mailan, Frantziako txapelketako finala jokatuko da Arrangoitzeko trinketean igandean. Preseski Arrangoitze, Basusarri, Ahetze eta Arbonako pilotariak biltzen ditu Lau Herri elkarteak. Beraz, Iban Teilleri eta Nicolas Dufauk beren trinketean jokatuko dute finala, Denek Bateko Lafitte eta Harizmendi Euskal Herriko txapeldunen kontra. Lau Herrik irabaziko balu, lehen aldia litzateke pilota eskola horretako bi pilotarik A mailako titulua erdietsiko lukeela. Finala urtarrilaren 19an jokatuko dira 17:00etan, eta Euskal Irratietan zuzenean eskainiko dugu. Partida handiaren aitzinetik, 16:00etan, haatik, 19 urte petiko finala jokatuko dute Lau Herrik eta Hazparnek. Goizean, 11:00etatik goiti, 22 urtez petikoen (Baigorri / Oztibarre) eta helduen B mailakoen (Baigorri / Irisarri) finalak jokatuko dira ere bai.

Lanbide foroak emankor Xiberoan. Gisa honetako gero eta hitzordu gehiago antolatzen dira gazte zein langabezian direnentzat Ipar Euskal Herrian. Anitzetan, lurraldeko lanbideen inguruko ezagutza ez da behar bezain handia, hautu bat egin behar duten eta kolegioa bururatzen ari diren ikasleendako. Xiberoan, gazteei hautu bat hartzen laguntzeko foroa antolatu dute Azia elkarteak eta ODACE enpresaburuen elkarteak, urtarrilaren 16an. Bertara gomitatuak izan dira Mauleko Argia eta San Frantses kolegioak, baita Atharratzeko kolegioko gazteak ere. Turismo, eraikuntza eta sozial arloko 50 enpresa xiberotarrek parte hartu dute, beren lanbide eskaintza aurkezteko eta ikasleak erakartzeko. Aurtengo arrakastaren ondotik, bigarren foro bat antolatuko dute heldu den urtean.

Alarma jo du, beste urte batez, OIP Presondegien Nazioarteko Behatokiak. Abenduaren lehenean marka berri bat hautsi zen frantses estatuan, 80.792 pertsona atxiloturekin. Espetxe-administrazioaren aitzinikuspenen arabera, gainera, 86.000 baino gehiago izan litezke 2027an egungo joerari eutsiz gero. Urtez urtez, beraz, gero eta jende gehiago metatzen da Frantziako presondegietan, zigor luzeagoekin eta baldintza okerragoekin. Baionako presondegiak bere aterpetze gaitasuna bikoizten du. Frantziako Justizia Ministerioaren datuen arabera, 166 preso ditu Baionako espetxeak, 75 aterpetzeko gaitasuna duelarik. Horrek erran nahi du, 9 metro karratuko geletan, hirunaka metatzen dituztela atxilotuak. OIP behatokiak baieztatu duenez, 3.600 presok lurrean ezarritako matalazetan lo egiten dute frantses presondegietan.

Departamenduko Laborantza Ganbarako hauteskundeen kanpaina abiatu da. Urtarrilaren 14an bozetara aurkezten diren hiru sindikatuen ordezkariekin bi oreneko eztabaida sakona antolatu zuten Euskal Hedabideek, osoki euskaraz. Sebastien Uthurriage eta Iban Pebet (FDSEA-JA), Maritxu Lopepe eta Julen Perez (ELB) eta Jean Pierre Suhit eta David Suzanne (Coordination Rural) hautagaiek parte hartu zuten mahai-inguruan. Besteak beste, laborari berrien instalakuntza, osagarri krisia, Ossau-Irati sor-markaren geroa, Hirigune Elkargoen politikak, klima larrialdia edota nazioarteko itunak ukan zituzten hizpide. Euskal Hirigune Elkargoak bultzatu nahiko lukeen Laborantzaren Erakunde Publikoaren sorreraren inguruan ere, sindikatu bakoitzak bere ikuspegia eman zuen.

30 urtez Translatines festibalak bazterrak inarrosi zituen antzerkiaren munduan Baionan. Chimères antzerki taldeak antolaturik, mundu mailako 250 antzerki talde jinarazi zituen 1981 eta 2014 artean, bereziki Hego Amerikatik. La Fura dels Baus, Els joglers edo Teatro de los Andes, ondotik mundu mailan fama handia izan zuten tropak hurbildu ziren festibal honetara. Ibilbide hortaz dokumental bat estreinatuko dute Jean Francois Hautin eta Nadine Perezek, Baionako Atalante zine gelan urtarrilaren 17an, 18:30etan.

«Lurraldetasuna transmititzeko» saioak proposatuko ditu Ataria elkarteak. Bost saioko modulo bat antolatu dute Ipar Euskal Herrira heldu berri diren herritarrei zuzenduak, baita tokiko enpresa, elkarte edo kolektibitateei. Saio horien bidez Euskal herriko historia, geografia, hizkuntza edota kultura ulertzeko gakoak eskainiko dizkiete. Urtarrilaren 18an; larunbatarekin, informazio bilkura bat eginen dute Itsasuko herriko etxean, eta otsailaren lehenetik goiti iraganen dira moduluak larunbatetan. Saio bakoitzeko 20 euroko parte hartzea galdegina izanen zaio parte hartzaile bakoitzari, eta saio orotan parte hartzeko engaiamendua hartu beharko dute.