Prefetak, helegitea pausatu du Euskal Hirigune Elkargoaren kontra, hautetsiek adostu zuten enpresen zergen emendatzea proposamena ezeztatzeko. Joan den Martxoan bozkatu zuten proposamena, Peio Etxelekuk gidaturiko Elgarrekin Herriarentzat taldeko hautetsiek kontra bozkatu bazuten ere. Enpresen gaineko zergak %1,4 igaiteko xedea du Elkargoak urtean bi miloi euro gehigarri biltzeko. Baionako Industria eta Merkataritza ganbarak ere gogor salatu dute zerga goititzea.
Adimen artifiziala zertan da Euskal Herrian? Euskarazko itzultzaile eta zuzentzaile adimendunak berriki ezagutarazi ditu Elhuyar fundazioak. Horretarako azken urteetan euskarazko testuetan oinarritutako datu baseak sortzen aritu dira ikertzaileak. Horietan da Oihane Kantero hendaiarra. Master bukaerako lana bukatu berri du eta adimen artifizialari euskararen eta Euskal Herriaren inguruko jakintzak nola irakasten ahal zaizkion ikertu du. Elhuyar fundazioan adimen artifiziala eta hizkuntza lotzen dituen arloa lantzen du.
1690an argitaratu euskarazko otoitz-liburu bat atzeman dute Frantziako Châlons-en-Champagne herrian. Ganer huste batean egin du aurkikuntza bertako liburuzain batek. Marinelei zuzendu «debozio liburu» hori, lehen aldiko argitaratu zen 1635an, Sarako Joanes Aranburu apezak idatzia. Gaur egun, sei edo zazpi ale besterik ez dira gelditzen munduan. Baionako liburutegian holako bi dituzte. Liburuzainak Baionako mediatekari eskaini dio bere aurkikuntza. Ez da oraindik jakina noiz iritsiko den iparraldera.
Hasi berri diren 20 proiektu diruztatuko ditu Euroeskualdeak. Urtero bezala, 2015 urtetik, deialdi baten ondotik hogei proposamen atxiki dira, denak mugaz gaindiko elkarlana dutelarik mamian. Euskal ihauterien berpiztea, hiru eskubaloi talderen trukaketa edo hizkuntz-oporren antolatzea familientzat besteak beste. Marie Heguy-Urain Euroeskualdeko hiritartasun saileko misio kargudunak azaldu duenez, orotara 500.000€ banatu dituzte aurten hogei proiekturen artean, Akitania Berriaren, Euskal Autonomia Erkidegoaren eta Nafarroaren arteko elkarlana sendotzeko.
Astelehen honetan Suhuskuneko eliza jendez bete da Ttale Ouret artzainari azken agurra egiteko. Sortzez, Suhuskunekoa zen, eta 83 urterekin pausatu zen joan den ostegunean. Elizako bida hartu zuen gaztetan baina 70 garren hamarkadan, laborarien eta bereziki artzain soilen eskubideen alde militatzen hasi zen, hortik gero artzain bilakatu zen. Euskal irratietan larunbat oroz artzainen berriak helarazten zituen bere iratiko etxolatik, eta Irulegiko irratiko laguntzaile handia izan zen.
Aurten, Jaizkibel Konpainiaren Hondarribia Berdintasunaren Hiria sariak hamar urte beteko ditu. Hondarribiko Alardean parte hartu nahi duen talde parekidea da Jaizkibel Konpainia eta, sari horrek genero berdintasuna eta arrazakeriaren kontrako borroka txalotzen du. Aurtengo epaimahaikideak Nieves Alza, Fermin Muguruza, Garbiñe Biurrun, Maddalen Iriarte, Arantxa Urretabizkaia eta iazko irabazleak izan dira, Antzuolako Alardearen ordezkariak eta Antzuolako Udala hain zuzen. Euskadiko Berdintasun Legea eguneratu zuten politikariak saritzea erabaki dute, horien artean EAJko Leixuri Arrizabalagaeta EH Bilduko Oihana Etxebarrieta. Sariak irailaren lehenean banatuko dira Hondarribiko Itsas Etxea auditorioan.
Burdinaren eguna ospatu zuten larunbatean Urdazubin. Egun berezi horrekin Bizkaiko Muskiz herriarekin zuten hartu-emana oroitarazi nahi dute.
Urtero merkatariaren eta herriko monasterioko abadeen arteko negoziaketa antzezten dute herritarrek, eta aldi honetan ere, Muskiz herriko biztanleak gomita ukan dituzte. Aurten ere 30 bat muskiztar jin dira Urdazubira, bi herrien arteko loturak azkartzeko. Burdinaren eguneko antolatzaile eta antzerkiko protagonistetako batekin mintzatu da Inhar Iraizotz lankidea:
Kukutxeztula edo coqueluche kasuek gora egin dute azken hilabete hauetan. Frantses estatuan iparraldean bereziki heriotzak eragin ditu.
Arnas aparatua larriki unkitzen duen eritasun hori lanjerosa izan daiteke bereziki haur gazteentzat. Baiona eta Donapaeulo larrialdi pediatrikoetan kasuak biderkatu dira, baina orain arte heriotzarik gabe. Kaiet Etxeberria Gure gomita izan da. Baiona eta Donapaleuko ospitaleetan pediatra da.
Euskal herriko etxe ekoizpenen aniztasuna eta kalitatea agertarazteko xedez Ezpeletan 26. Idoki Feria iraganen da agorrilaren 9 honetan. Ezpeletako merkatu estaliko kanpoko aterpean hamasei etxalde izanen dira present. Hamabost bat salmahaitan Idoki sormarka duten gasna mota ezberdinak, Kintoa txerrikia, ezpeletako biperra, erreximentak, eztia edota sendabelarrak. Feria goizeko 9.30etatik goiti eta 18.00ak arte irekia izanen da.
