Gero eta alokatzaile gehiagori gertatzen zaio etxetik kanporatua izatea. Abbé Pierren adierazpenetik 70 urte pasa diren egun berean, ekintza bat burutu du Aldak Baionan. 30 bat pertsona lerrokatu dira suprefeturan, aurpegia maskara xuriz estalirik eta ezpata bat zutela zintzilik gainean. Alokairu eteteen bidezko kanporaketa kasu andana zenbatu dituzte azken hilabeteetan; horren erakusgarri da iaz 97 laguntza galde jaso zituztela. Besteak beste, Fabrice Duponten kasua azpimarratu du Aldak. Hemeretzi urtez apartamentu batean bizi izan da Miarritzen, eta orain, Kaledonia Berrian bizi den jabeak kanporatu nahi du, apartamentua saltzeko xedea duelako. Sustengu gaualdi bat antolatzen du Aldak otsailaren 24an, Duponten gastuei buru egiteko.

Ez da bakerik Arbonan, auzapezaren eta oposizioaren artean. Eskola berriaren eraikuntzak bazterrak inarrosten segitzen du; oposizioak, beste behin ere, lur kutsatuen gainean eraikitzen ari direla leporatu dio Marie-Josée Mialocq auzapezari. Eta berrikuntza da, oposizioak egin eskaerari erantzunez, urte bat berantago eta ARS eskualdeko osasun agentziaren aholkuak segituz, epaileak lurren azterketa sakonagoa galdegin duela. Mialocq auzapezak, aldiz, difamazioan aritzea leporatu dio oposizioari, eta behar diren azterketa oro eginak izan direla baieztatu du. Eraikuntza lanekin segitzeko asmoan berretsi da, epaileak azterketa galdegin duen arren.

Irakasle postu gehiago eta lansarien hobetzea galdegin du hezkuntza saileko langileak. Bordeleko akademiaren eremuan, ehun postu gutxiago izanen dira, 70 gutxiago lehen mailan eta 31 bigarren mailan. Hori dela eta, CSA Administrazioko komite sozialaren azken bilkuran uztea deliberatu dute sindikatuek, eta greba egiteko deia luzatu dute. Baionako manifestaldia FSU, FO, CGT, SUD, SGEN eta UNSA sindikatuek antolatu dute, eta 850 pertsona batu dituzte. Bordeleko akademiaren arabera, langileen %20k parte hartu du greban, eta Ipar Euskal Herriko hainbat ikastetxe hetsirik izan dira. 

San Mixel eskola ohiaren geroa, berriz ere, Donaixtiko agiantzen erdigunean. Eskola 2008 urtetik hutsa izan da, eta iazko udan eskuratu zuen eraikina Donaixtiko herriko etxeak.  2024ko agiantzetan, Andre Larralde auzapezak proiektu gotor horren xehetasunak argitu ditu. Ekimen kulturalak antolatzeko gela handi bat izanen da bertan, eta sei apartamentu sozial ere eraikiko dituzte. Eskualdeko parke naturalaren bulegoa ere bertan kokatuko da, baita bisitari taldeentzako gune bat. Gunea kudeatzeko eta ekitaldiak antolatzeko, Elkarte izeneko elkartea sortu dute, Oztibarreko bi gazte kontratupean hartuko dituena, herritar zerbitzu gisa.

Julien Charles prefetak hats bat eman dio Mauleko hiltegiari. Zuzendaritza berriak hiltegia bide onean ezartzeko «aukera oro ukan ditzan», kategoria apaltzeko prozedura gibelatuko du. Asteazkenean hiltegi horren egoera salatu zuten laborariek, Maulen eta Baionan. Xiberutik Lapurdiko hiriburura eraman zuten protesta, Euskal Hirigune Elkargoaren atariraino. Bertan, Jean René Etxegarai presidentearekin eta Isabelle Pargade, presidente ordearekin bildu ziren. Elkargoaren aitzinean errotak bota ondotik, suprefeturara, DDTM Lurraldearen eta itsasoaren departamenduko zuzendaritzara eta Angeluko hiltegi pribatura joan ziren. Etxegaraik eta Pargadek laborarien arazoez eztabaidatzeko bilkura bat antolatuko dutela hitz eman dute.

Mauleko kabala hiltegiaren inguruan bildu da laborarien kexua. Bertako haragia mailaz jaisteko asmoa erakutsi dute Estatuko albaitaritza zerbitzuek. Neurri horrek, bistan dena, produktuen prezioan eraginen luke. Laborarien ustez, erabaki horrek Mauleko hiltegiaren hestea ekarriko luke. Hori dela eta, ehun bat laborarik elkarretaratzea egin dute gaur goizean Maulen. Traktore konboi oso bat buruan, «karakoil operazioa» egin dute Baionaraino. Xiberoko hautetsiek ere babesa helarazi diete laborariei, eta gutun bat igorriko diote Departamentuko prefetari. 2016tik  Mauleko hiltegia zaintzapean da, L214 elkarteak bertan egiten ziren kabalen kontrako tratu txarrak argitara eman zituenetik.

Hilabetea iragan da EH Bilduko Joseba Asiron Iruñeko auzapezgoa eskuratu zuela. Abenduaren 28an berreskuratu zuen nafar hiriburuko aginte makila, UPNko Cristina Ibarrolaren kontrako zentsura mozioaren bidez. Horretarako, PSN alderdiaren aldeko bozkak ukan zituen. Lehen aldia da indar politiko espainiar horrek ezker abertzaleari babesa ematen diola erakunde nagusi bat eskuratzeko. Zentzu horretan, «lankidetza iraunkor berri bat» plantan emateko esperantza du Asironek.

Ezinegona ere Frantzia eta Ipar Euskal Herriko zentro sozialetan. Departamenduko zentroek Pauen mobilizatzeko deia egin dute asteazken honetarako, Estatuaren aldetik geroz eta ahal ekonomiko gutxiago jasotzen dutela salatzeko. Mobilizazioen ondorioz, Frantzia mailan, berrogei departamentuko ehun bat zentro sozial hetsiak izanen dira.

A63ko Touya zubia askatu zuten atzo arratsaldean, sei egun eta bost gauen ondotik. Traktoreak eta lasto metak atera dituzte arratsaldeko 3ak alde, goizean goiz, Baiona eta Angeluko bi supermerkatuetan ongarria isuri ondoan. Zubia utzi badute ere, Parisko laborantza saloian edo uda honetako Joko Olinpikoetan ekintzak burutzea aurre ikusten dute haien eskakizunak ez badira asetzen. Frantziako beste lekuetan mobilizazioen segitzen dute eta Parisera buruz itzuli dira asko. Hauekin bat egitera deitu dute 50 bat elkarte ekologistek, horien artean, Greenpeace, Alternatiba, Attac edota Lurraren altxamenduak.