Akitania Berriko TER tren ibilbideak enpresa pribatuen arteko lehiara idekiko dira gradualki, 2030era bitarte. Alain Rousset presidenteak bultzaturiko TER hitzarmen berria, astelehenean bozkatu dute eskualdeko kontseiluan, aldeko 108 eta kontrako 75 bozkekin. Rousseten ber talde politikoan den Andde Sainte Marie kontseilariak hitzarmen berria defendatu du. Lege berriarekin zazpi urterako izenpetuko liteke kontratua SNCF enpresa erdi-publikoarekin, baina urtez urte konkurrentziari irekiz. Parean, neurri horren kontra agertu dira burdinbideetako langileen sindikatuak.

Mugerreko pleita gunea handitzeko xedea adierazi du Euskal Hirigune Elkargoak. Gune horretan ezarriak diren enpresek maniobra ahalmen handiagoa nahi lukete merkantziak trenetik kamioietara kargatzen dituztenean; ondorioz, hamazazpi hektareako eremuan zabaldu nahi lukete egungo azpiegitura. Eremu hori gune hezea da, eta betoinez betetzea gaitzetsi dute CADE eta Mugerreko ingurumenaren aldeko taldeak. CNPN Naturaren Babeserako Kontseilu Nazionalaren ikerketak ere, proiektuaren kontrako iritzia eman du. Bestalde, gune horretan ere medikuntza tresnen salmentan ari den DJO enpresa ezartzea aurreikusia da, nahiz eta tren jarduerarekin zerikusirik ez ukan. Ingurumenaren aldeko elkarteen arabera, enpresa hori urrunago den gatzaga ohian plantatzen ahal litzateke ingurugiroa kaltetu gabe.

Duela astebete 15 ekintzaile ekologista atxilotu zituen poliziak, Frantziako zuzendaritzaorde antiterroristaren aginduz. Horietarik bi euskal herritarrak ziren, bata baiones bat eta hendaiar bat, biak Tolosan bizi direnak. Bouc-Bel-Air Marseilla ondoko herrian den Lafarge zimenta enpresan protesta ekintza bat egiteaz susmagarri omen ziren. Lau egunez atxiki zituzten polizia etxean, eta ostegunean aske gelditu ziren nehongo kargurik gabe. Gaurko goizberri saioko gomita izan da Jakes Bortairu OSTIA kolektiboko kidea.

Zakuak eskuan eta kautxuzko botak oinetan. Tona erditik goiti hondarkin bildu dituzte igande goizean Urepelen, Lohiatzeko edo Kintoako errekatik. Iturritik elkarte sortu berriaren lehen garbiketa ekintza izan da, eta 28 pertsona bildu dituzte. Oro har, plastiko zatiak, kristalezko botilak eta metal zaharrak erauzi dituzte uretatik gehien-gehienak aspaldikoak. Lau kilometro garbitu dituzte orotara, eta haien helburua da Aldudeko Errobiren arroa osoki garbitzea, 35 kilometroko luzeeran barrena.

Maiatzaren 28an Nafarroako parlamendurako eta Hegoaldeko udaletako bozak iragan ziren. Halere oraindik badira galdera anitz argitu gabeak, aliantzen dantza hasia baita gehiengo osoak erdiesteko. Ekainaren 17an herriko etxe guztiak osatuko dira, eta dirudienez Iruñean eskuinak segituko du agintean, PSNk ez baitu Joseba Asiron EH Bilduko hautagaia babesteko asmorik. Gasteizen ere EH Bildu lehen taldea izan arren, aliantza eginen dute PSEk eta EAJk auzapezgoa hartzeko. Bestelako erakundeetan beranduago jakinen dira aliantzen xehetasunak, haatik Gipuzkoan ere EH Bilduk zail izanen du Aldundiko makila eskuratzea, aliantza zabala egin baitute EAJk eta PSEk, espainiar eskuinarekin. Nafarroako egoeraz gehiago erran digu Juan Kruz Lakasta, Euskalerria Irratiko kazetariak Goiz Berri saioan:

Bouygues eta Office 64 promotoreen proposamenak legea urratzen dutela ondorioztatu du txostenagile publikoak, baita epaileak ere. Maiatzaren 16an iragan zen audientzia Paueko auzitegian. Eraikinen dimentsioek ez dituzte errespetatzen legezko neurriak. Haatik, epaia heldu aitzin trenkatu nahi lukete gaia proiektuaren aurkariek. Horretarako bilkura erronda abiatuko dute promotore eta erakunde publikoeekin. Urte hunen bukaeran trenkatuko da ere 2019an Kanboko herriko etxeak eta Elkargoak onartu zuten Tokiko hirigintza Plana legezkoa den ala ez. Izan ere, CADE talde ekologistak auzitan eman zuen.

Senatuko hauteskundeak iraganen dira heldu den irailaren 24an. Baina hori aitzin, ostiral honetan herriko etxe bakoitza bilduko da, irailean bozkatuko duten kontseilarien zerrenda izendatzeko. Sufragio unibertsal ez zuzenaren bidez hautatzen baitira senatariak. Departamendu honetako orain arteko senatariak Frédérique Espagnac, Denise-Saint Pé eta Max Brisson dira eta badirudi hiruak berriz aurkeztuko direla irailean. Departamendu honetan 2.321 hautetsi izendatuko dira iraileko senatuko hauteskundeetan bozkatuko dutenak, eta 1.921 ordezko. Jean René Etxegarai Baionako auzapeza eta Hirigune Ekargoko lehendakariaren izena aipatzen da senatuko hauteskundeetarako hautagai gisa. Alderdi politiko ezberdinengandik hainbat proposamen izan dituela adierazi du, baina ez duela oraindik deus trenkatua. Senatura aurkezteko beste karguak utzi beharko lituzke eta hori konplikatua iduritzen zaio. Bestalde, EH Bai koalizazioa ados agertu da Frédérique Espagnac PS-ko hautagaiaren zerrendarekin bat egiteko. Jean René Etxegarai eta EH Baiko Nikolas Blain, hurrenez hurren:

5000 euroko isuna, erdia gibelapenarekin, eta enpresa bat kudeatzeko debekua urte batez. Hara zer galdegin duen prokuradoreak Michel Etxebest Mauleko auzapez oiharen kontra. Auzia Paueko auzitegian iragan da astearte honetan. SEM egiturako administrazio kontseiluko presidente zelarik, Agerria domeinuko bilkura baten bilduma bat «faltsutzeagatik» auzipetua izan da Etxebest. Louis Labadot gaur egungo Mauleko auzapezak bultzatu du salaketa. Michel Etxebestek epaiketan azaldu duenez, «Maule eta Agerria egituraren alde egin nahi izan du». Deliberoa uztailaren 4an jakinen da.

Hirigune Elkargoak Euskal Mendia Leader programaren 2014-2022 epealdiko bilana aurkeztu du atzo Baigorrin, ehun bat eragileen aintzinean. Orotara 63 elkarte, 29 egitura publiko eta 15 enpresa pribaturen 135 proiektu bultzatu dituzte hiru milioi eurorekin. Bilana egitearekin batera, 2026 urtera arte luzatuko den dispositiboa aurkeztu dute. Aldi honetan, lau milioi euro banatuko dituzte. Aurtengo bi deialdi aurkeztu dituzte: 40.000 euroko laguntza mendi biziak deitzen den ekitaldi antolakuntzarako eta 80.000 euroko diru zama, mendi guneko emaztearen balio argitan emanen duen proiektua sustatzeko. Andde Sainte Marie Akitania Berria eskualdeko kontseilaria izan da gure Goiz Berri saioko gonbita.