Paul Urkijoren IRATI filma ikusiena izan da Bizkaian, Gipuzkoan eta Araban estreinaldiko asteburuan. Euskarazko film batek izan duen estreinaldirik arrakastatsuena izan da. IRATI abenturazko film epiko bat da historia eta fantasia uztartzen dituena. Eneko Sagardoy, Edurne Azkarate, Kepa Errasti edo Itziar Ituño dira besteak beste filmeko aktoreak. Paul Urkijo zuzendariarekin mintzatu da Maia Muruaga.
Ipar Euskal Herriko berezkoetan nagusi dela erakutsi du Luis Sanchez nafarrak. Buruz burukako finala irabazi du 40 eta 29, Battitta Ducassouren kontra, atzo Hazparneko Berria trinketean. Goi mailako finala izan da. B mailako finala Donibane Garaziko Garatenean iraganen da astelehen honetan, atsaldeko 17:00etan Inhar Ugarte eta Jon Saint-Paulen artean.
Gatibu taldeak martxoaren 18an Bilboko Miribillan aurkeztuko du 'Euskal Herria distopikala' diskoa. Euskal Herrian eginen duen aurkezpen kontzertu bakarra izanen da momentuz. Arratsaldeko 19:00etatik aitzina irekiko dira ateak. Gatibu taldeak plazaratzen duen estudioko hamargarren lana da hau. Haimar Arejita taldeko gitarra joleak aurkezpen kontzertu berezi horren berri eman digu.
Hauteskundeen ondotik, polemikak ez dira baretu Senpereko herriko etxean. Bernard Elhorgak, hauteskundeen bi itzulien artean bere fede aitorpenean, abertzaleen taldea «bere baitan hetsirik egoiten den ideologia» zela argitaratu du. Higiezin agentzietako margoketak ere azpimarratuz. Christophe Jauregiren 'Hats Berri' taldeak auzapez berriaren «hitz iraingarriak» salatu ditu. Sortu haserrearen parean, Elhorgak barkamenak galdegin dizkio talde abertzaleari, «hutsegin duela» argudiatuz.
Euskal sagardoa AOP sormarka, Europari galdetzeko desmartxak egiten ari dira Araba, Bizkaia eta Gipuzkoako sagardo egileak, Eusko Jaurlaritzaren laguntzarekin. Ondorioz, Europako Batasunak onartuz gero, 'Euskal Sagardoa' izendapena erabiltzeko zailtasuna ukanen lukete Ipar Euskal Herriko ekoizleak. Hori dela eta, bilkura egin dute Euskal Autonomia Erkidekogo ekoizle eta ordezkari politikoekin, aterabide bat atzemateko. Europak izendapen hori onartuz geroz, gerora, Ipar Euskal Herriko eta Nafarroako lurretara zabaltzen ahalko dela adostu dute. Aferaz argitasunak eman dizkigu 'Sagartzea' elkarteko Gabriel Durrutik:
