Bai Euskarari elkarteak antolatutako EnpreSarea Foroan euskarak duen mugazgaindiko kohesiorako gaitasuna aztertu dute Irungo Ficoban. “Euroeskualdeko hiritartasun” proiektuen baitan, administrazio publikotik hasi eta enpresa mundura, bi lurraldeetako harremanak sustatzeko ahuleziak eta indarguneak izan dituzte hizpide.

ELBk berriz ere bere arrangurak agertarazi ditu hegazti gripeari begira. ELB sindikatuak jakitera eman duenez, iragan hiru asteetan 70 kuitsadura kasu aitortu dira Aturri arroko etxaldeetan, horietatik 50 Gersen, 18 landesetan eta bi Pirinio-Atlantikoetan. Departamenduko osasun zerbitzuek, DDPak, Akamarreko hiltegia errekisizionatu dute hegazti kutsatuak bertan hiltzeko. ELB sindikatuaren iritziz, horrek eritasunaren hedatze lanjera emendatuko du, hegazti eriak gune sano batera garraiatuko baitituzte. Horrela mintzatu da, Patrick Dagorret ahate hazlea:

Euskal Herriko Historiaren Memoria biltzen duen gune bat estrenatu zuten larunbatean Senperen. Ehunka pertsona bildu ziren Helbarrun auzoan, Anai Arteak antolaturiko ekitaldi berezian. Plaka batzuen bidez, Euskal Herriaren historiaren pasarte batzuk irudikatu dituzte, eta QR kode batzuen bidez historia hori entzun daiteke telefono edo ordinagailuetan. Bertsoak, hitz hartzeak, aurreskua eta Gernikako arbolaren kantuaren bidez Anai Artea elkarteak bukaera eman dio ere 50 urteko ibilbide luzeari.

Aliantzen sasoina heldu da Hego Euskal Herrira, igandeko bozen ondotik. Nafarroan Maria Chivite egungo presidenteak, azken lau urteetako gehiengoa erdiesten ahaleginduko da, nahiz eta UPN nafar eskuina nagusitu. EH Bilduren babesa beharko du horretarako. Ber gisan, EH Bilduk PSNren laguntza beharko du Iruñean Joseba Asiron auzapez izateko. Gasteizko udalean eta Gipuzkoako Aldundian EH Bildu garaile izan da baina EAJ eta PSE alderdien usaiako itunak, gobernatzeko aukera kenduko lioke. Bilbon eta Bizkaian, aldiz, jeltzaleak nagusitu dira. Nolanahi ere, Abstentzioa %38koa izan da, azken urteetan baino gorago.