Joan den astean, Eztitxu Robles kolegioko hirugarreneko ikasleek ikasturte amaierari kolorez beteriko azken ukitua eman zioten: kaleko arte proiektu parte-hartzaile bat, mural baten margoketa, Udane Juaristi “Udatxo” artista azkoitiarraren eskutik. Irungo kaleetan egindako muralengatik ezaguna den artistak Baionara ekarri du bere esperientzia, eta 46 ikaslerekin elkarlanean horma-irudi bat sortu dute kolegioko pareta batean. Muralak ikasleak irudikatzen ditu, bizkarrean zakuak dituztela, eskolara sartzen edo handik ateratzen. “Etorkizunari begira dauden gazteak islatu nahi izan ditut”, azaldu du Udanek. Proiektuari ekin aurretik, ikasleek Baionako muralen ibilbide bat egin zuten, eta Street art-aren inguruko lanketa bat gauzatu zuten arte irakaslearekin. Mendi Esteban irakaslearen hitzetan, “helburua ikasleak motibatzea eta beren buruak hobeki ezagutzea izan da”. Muralak ez du soilik horma bat apaindu: belaunaldi baten aztarna bilakatu da, kolegioko paretetan luzaz biziko den oroitzapen koloretsu bat.

Betharram ikastetxearekin lotutako sexu eta bortizkeria kasuak ikertzeko asmoz, Batzorde Ikerketa Independenteko kideek lekukotasunen bilketa abiatu dute. Deialdia zuzentzen zaie biktimei, ikasle ohiei eta gaiaren inguruko informazioa duten herritar guztiei. Otsailaren bukaeran, Betharrameko kongregazioak jakinarazi zuen ikerketa independentea martxan jarriko zuela. Orain, komisiorako testigantzak jasotzeko online plataforma bat ireki dute. Testigantza emateko, hiru aukera eskaintzen dira, anonimotasun eta konfidentzialtasun mailaren arabera: Anonimotasun osoz, izena jakinarazita baina testigantza anonimizatuz eta identitatea publiko eginez. Batzordeak bilduko dituen lekukotasunak artxiboekin konparatuko ditu, eta irailetik goiti lekukoak entzunak izan daitezke. Ikerketa aitzina eramango dute batzordeko hamar kideek, haien artean zuzenbide, osasun eta gizarte arloko profesionalak. Deialdi hau Ipar Euskal Herrira ere zabaltzen da. Biktimek urriaren 17ra arte dute beren lekukotasuna helarazteko aukera.

50 pertsonatik gora bildu ziren atzo Hazparnen, Puyo Agentziaren aitzinean, 2024ko urtarrilean agentzia hori okupatu zuten zazpi kideei sostengua adierazteko. Ekintza hark salatu nahi zuen Aiherrako Etxexuria baserriaren salmenta espekulatiboa: 250.000 eurotan erosi ondoren, 1.579.000 eurotan jarri zen salgai zazpi urte geroago, Puyo agentzian. Zazpi kideak irailaren 30ean epaituko dituzte Baionako auzitegian. Epaiketaren kontra, mobilizazio egun bat antolatu dute irailaren 27rako, Arana plazan.

Lauak enpresako langileak zer bilakatuko dira? Joan den astean Lauak enpresak jakinarazi duenez, bere kapitalaren %51 Indiako Wipro multinazionalari saldu dio. Salmenta hau Mikel Charritton en arabera gauza on bat da multinazional horrek garapena ekartzen ahalko baitu, hala nola teknologikoa edota internazionala mailan garatzeko. Enpresako antolamendua adosmen batekin finkatu dute. Lau urteko plan bat adostu dute bi buruek, zeinetan adostu den Mikel Charriton Lauak enpresako jabe ohia bederen ondoko lau urteetan zuzendari nagusia egonen den eta enpresako langileek ere bederen 2029a arte Lauak enpresan lan egiten ahalko duten. 4 urte horietan zehar enplegu berri batzu sortuko dituzte garatzeko helburua baita, hala nola Indian, Frantzian diren sektoreetan, eta beste. Garapen horren helburua munduko lehiaketan maila on baten atxikitzea da. Mikel Charritonek gehitu du deslokalizazio arriskurik ez dela izanen ez delako Wipro indiar multinazionalaren helburua.