Alain Rousset Akitania Berriko presidenteak eta Imanol Pradales Euskadiko lehendakariak berriz berretsi dute Abiadura Handiko Trenaren (AHT) aldeko konpromisoa. Atzo, Bordalen egin zuten agerraldi batean, bi ordezkariek azpimarratu zuten trenbide berriak “lurraldearen eraldaketarako motorra” izan nahi duela, baita Europako korridore atlantikoaren funtsezko osagai estrategikoa ere.

Hala ere, ikuspegi hori ez dute partekatzen Bizi! eta CADE elkarte ekologistek. Bi taldeek salatu dutenez, proiektua “suntsitzailea” eta “xahutzailea” da, eta ingurumenari eragingo dizkion kalte larriak, lurzoru okupazio handia eta gardentasun demokratikoaren falta nabarmendu dituzte. Horrez gain, Bizi!ren arabera, Ipar Euskal Herrian 30 urteko oposizio zabala egon da AHTaren aurka, eta oraindik ere ez dago frogatuta proiektuaren errentagarritasun ekonomikoa.

Kritika horien harira, Bizi! elkarteak hitzaldi publiko bat antolatu du ostiral honetan, abenduaren 5ean, Urruñan. Ithurbidea gelan izango da, 19:30ean, eta CADE zein ELA sindikatuko ordezkariek parte hartuko dute. Hitzaldiaren izenburua honakoa da: “Zer gordetzen da Abiadura Handiko Trenbide proiektuaren diskurtso ofizialaren gibelean?”