Intersindikalak mobilizaziora deitu du bihar, irailaren 18an, Frantzia osoan, gobernuak aurkeztutako aurrekontu neurrien kontra. Sindikatuen esanetan, neurri horiek bidegabeak dira eta ez dira eraginkorrak, eta kalte zuzena eragingo diete langileei, pentsiodunei eta gazteei.

Besteak beste, gaixotasun geldialdietan karentzia egunak luzatzea, bi besta egun kentzea, pentsioen izoztea, langabeziaren eskubideetan murrizketak eta medikamentuetan herritarren ordainketa bikoiztea jasotzen dute neurriek. Sindikatuen hitzetan, horrek pobrezia areagotuko du eta zerbitzu publikoak kolokan jarriko ditu. Sindikatuentzat, Baionako ospitalearen egoera, horren adibide da.

Mobilizazioa zabala izango dela azpimarratzen dute, eta LAB sindikatua ere batuko zaio, nahiz eta ez den intersindikalaren barnean. Manifestazioak goizeko 10:30ean abiatuko dira: Baionan, San Ursuya plazatik, eta Pauen, Verdun plazatik.