Kasik bi hilabetez hetsia izan ondotik, berriz zabaldu dituzte ateak Baionako Lesseps kaian kokatua den Point Accueil Jour edo Eguneko Harrera Gunean. Uztailaren erdian behartuak izan ziren zerbitzua ixtera, osasun arazo larriak zirela eta.

Izatez, gunea ixteko arrazoi nagusien artean zeuden labezomorroak eta arratoiak agertu izana, instalazio elektrikoa araudietatik kanpo egotea, eta hezetasunaren ondorioz hainbat tokitan sortu ziren lizunak. Oraingoan, berriz, partzialki baino ez da ireki: oraingoz dutxak eta garbigailuak berriz martxan jarri dituzte, baina ez dute publikoari zuzenean harrera egiteko aukerarik. Horrek mugak ezartzen dizkie egunero bertara hurbiltzen diren ehun pertsonatik gorakoei.
Elkargoak aurki abiatu behar ditu beharrezko lanak, besteak beste elektrizitateari eta saneamenduari dagozkionak. Obrak burutu ondotik, urte bukaeran berriz osoki irekiko dutela espero dute.