Batera plataformak gaur egungo Euskal hirigune elkargoa estatus bereziko lurralde bat bilakatzeko gogoeta abiatzea galdegiten du elkargoaren baitan. Beren iduriko, herri elkargoak eraman behar du eztabaida hori bere bilakaerari buruz.

Baterako kideek azaldu dute estatus bereziko lurralde bat bilakatzen balitz elkargoa, aterako ginateke herrien arteko kooperaziotik eta podere gehiago ukanen luke instituzioak. Gainera, kasu horietan, herritarrek dituzte hautetsiak hautatzen instituzio berrian aritzeko.

Euskal hiriguneko mandatu hastapenetik neurriak hartzea eskatzen dute Baterako kideek. Horretarako, hautetsiei galdegiten dute: Hautetsi bat ofizialki izendatzea gai horren ardura ukanen duena, lan talde bat muntatzea gai horren ikertzeko, baliabideak hortan ezartzea eztabaida horretan (baliabide teknikoak, diru baliabideak eta langileen inplikazioa), eta, azkenik, kabinete bat misionatzea ikerketa juridiko eta teknikoak egiteko.

Batera herri mugimendu bat delako, maiatzaren 9an Itsasuko Sanoki gelan herritar eta eragile guztiak gomitatzen dituzte Baterako biltzar nagusira.