Biharko laborariek arranguraz bizi dute behien Dermatosi Nodular Kutsakorraren agerpena eta behi eri bat atzemanez gero tropa osoa hil behar izatea. Behien txertatzea bihar hasiko bada Ipar Euskal Herrian, ostegun goiz honetan mobilizazioa egin dute Donapaleuko Jean Errekart laborantza lizeoko ikasleek, inguruko dozenaka laborarirekin batera; ospitaleko biribilgunean trafikoa blokatzea erabaki dute.

Laborari eta ikasleen mobilizazioa Donapauleko itzulgune nagusian. Behien hiltze masiboen kontrako ekintza. #Donapaleu pic.twitter.com/Fp18uO4boj

— Euskal Irratiak (@euskalirratiak) December 18, 2025

50 bat traktore bildu dira hala Donapaleun, eta arratsalderako Mauletik Xiberoko laborantza lizeoko ikasleak bertze 30 traktorerekin etortzea ere espero dute. Ondotik, Beskoitzera joanen dira, A64 autobidean oraindik ere plantan den blokatzera.

Allande Doiarzabal ikasle senpertarraren hitzetan "gaurko laborantza ez da batere ona", eta horregatik mobilizatzen dira. Haragi behiak ditu hark etxean, eta betidanik laborantza giroan hazirik ere, eritasunekin egun bizi den egoera kezkaz bizi duela azaldu du Euskal Irratietan.