Donibane Erne! – Saint Jean autrement – kolektiboak iragarri du 2026ko Donibane Garaziko herriko hauteskundeetan zerrenda berria aurkeztuko duela. 2020ko bozetan bozen %44a bildu eta lau hautetsi eskuratu ostean, taldeak berriz ere lehiatuko du, bere burua «donibandar guzientzat etorkizuna erabakitzeko aukera» gisa aurkeztuz.

Kolektiboak adierazi du bere helburua «funtsezkoak, errealistak eta koherenteak» diren ideiak sustatzea dela, eta proiektu inklusibo bat defendatuko duela, herritar guziei zuzendua. Auzoetako ordezkariek osatutako zerrenda baten bidez, ikuspegi bateratzailea indartu nahi du, erabakiak ahalik eta parte-hartzaileenen bidez hartzea bermatuz.

Donibane Erne! mugimenduak Baxe Nafarroako hiribururako egitasmo ekologiko eta jasangarri bat aurkeztuko du, ekintza sozial sendoekin uztartua. Aldi berean, euskaraz bizi ahal izateko baldintzak indartzea izanen da bere lan-lerro nagusietako bat, herriaren nortasuna eta bizitasuna erdigunean jarrita.

2026ko hautagaitza osatzeko eta defendatuko dituzten proposamenak azaltzeko, kolektiboak lehen bilkura publikoa antolatu du. Hitzordua azaroaren 27an, ostegunez, 20:00etan, izanen da Nafarroa gelan, eta herritar guziak deitu dituzte parte hartzera.