Astearte gau honetan, egun osoko auziaren ondotik, Baionako auzitegiak sei urteko espetxe zigorra ezarri dio Eric Olhats Errealeko futbol ikuskatzaile ohiari, adingabeen kontrako sexu erasoengatik eta irudi pedopornografikoen edukitzeagatik. Egunean zehar epailearen aitzinean ukatu ditu gertakari guztiak, “absurdoak” eta “oinarririk gabekoak” direla erranez.

Prokuradoreak zortzi urteko espetxe zigorra galdegina zuen ikuskatzaile ohiarentzat, alta, epaileak sei urtera kondenatu du.

Epaileak izan diren lekukotasunak azaldu dizkio akusatuari auzian zehar. Horiek diote Biarneseko Rivehauten egin zen ikastaro batean Eric Olhatsek zenbait aldiz masturbatu zituela, film pornografikoak erakutsi zizkiela gazteei eta eraso sexual fisikoak izan zirela. Epaileak auzian erran du omen entrenatzaile ohiak usu hunkitzen zituela gazteak eta haiekin biziki zorrotza zela bere jarreran. Akusatuak erantzun dio ez zela hala, formalki ukatu ditu akusazioak adieraziz "absurdoa" dela. Alain Larrea bere abokatuak azpimarratu du ez dela froga zuzenik aurkeztu, eta auzian hitz baten kontra beste baten hitza dela. Futbol entranatzaile ohiaren jarrera beti profesionala izan dela defendatu du.

Instrukzioan aurkitu ziren telefonoaren barneko argazki eta mezu susmagarriei buruz galdekatu dute akusatua: telefonoan masturbatzen ziren gazte biluzien irudiak aurkitu zituzten eta ferekak aipatzen zituzten mezuak. Olhatsek “interpretazio kontua” dela erantzun du bere burua defendatzeko. Zenbait biktimek haien lekukotasunak eman dituzte epaitegian. Jasan zituzten eraso sexualak azaldu dituzte, batez ere Eric Olhatsek ferekatzen zituela, biluzik ematea galdegin ziela edota masturbatu zituela. Aipatu da ere akusatzailea usu gazteen etxera jiten zela. Lekukotasunen arabera, erasoak usu futbolari gazteen etxean edota futbol ikastaroetan gertatzen ziren.

2019ko azaroan bidalitako gutun anonimo batek salatu zituen lehen gertaerak, eta geroztik haur zirelarik entrenatu zituen sei pertsonek egin zuten salaketa. Salatu dutenen arabera kasu gehienak 1997 eta 2002 artean gertatu ziren, eta, 2021 eta 2022 artean berriro kasuak izan dira. Biktimek adierazi dute entrenatzaileak ukitu desegokiak egin zizkiela, film pornografikoak erakutsi, eta mezu desegokiak bidali zizkiela. Jokalarien arabera, Olhatsek hainbat haur hartu izan zituen bere etxean garai hartan, baina Antoine Griezmann frantziar internazionalak, berretsi du behin baino gehiagotan, berak ez zuela ezer antzeman.

Futbol entrenatzaile ohia 1990eko hamarkadan hasi zen haur eta gazteekin lanean Aviron Bayonnais klubaren baitan. Futbolaren munduan, Olhats ezaguna da berak deskubritu zuelako Antoine Griezmann futbolaria. Griezmann bera ere entzuna izan da ikerketan, baina ez du inolako gertakaririk salatu.

Olhats 2022an espetxeratu zuten lehen aldiz, baina 2023an askatu zuten kontrol judizialpean. Hala ere, iaz berriro atxilotu zuten, debekatua zuen futbol zelai baten inguruan ibili zelako.