Euroeskualdearen Batzar Nagusia Nafarroako Jauregian bildu da, eta 2025erako aurrekontu-marko berria onartu du. Guztira, 900.000 euroko diru-laguntzak onartu dira, bi ardatz nagusitan banatuta: Alde batetik, euroeskualdeko herritartasuna sustatzeko ekintzak, hala nola kultura, hezkuntza eta eleaniztasuna, 500.000 euroko aurrekontuarekin. Bestalde, berrikuntza eta sektore ekonomiko estrategikoak bultzatzeko programak, 400.000 euroko inbertsioarekin.

Horrez gain, POCTEFA deialdiaren baitan hautatutako hiru proiektu estrategiko aurkeztu dira. Anje Sainte-Marie Akitania Berriko kontseilariak berrikuntzaren garrantzia azpimarratu du proiektu hauetan: TRANSFERMUGI, mugaz gaindiko garraioa optimizatzeko; LANEAN, lan-merkatuaren integrazioa indartzeko; eta HEZHI, eleaniztasuna eta hizkuntzen ikaskuntza sustatzeko.

Frantziako gobernuaren jarrera salatua

Hiru entitateetako lehendakariek –Euskadi, Nafarroa eta Akitania Berria– Frantziako gobernuaren jarrera kritikatu dute, eskualde kontseiluen eta Europaren arteko harremanak oztopatzen dituela eta diru-laguntzen kudeaketan trabak jartzen dituela argudiatuz.

Anje Sainte-Marie-k honen inguruko azalpenak eman ditu, eta Euroeskualdearen borondate irmoa berretsi du lurraldeen integrazioa sendotzeko eta mugaz gaindiko lankidetza indartzeko.

Donostia-Baiona trena proiektua martxan

Mugikortasunaren arloan, Donostia eta Baiona arteko tren edo topo erregularra martxan jartzeko proiektua, "Eguneroko Trena", aurrera doa. Sainte-Marie-k baieztatu du egitasmo honek garraio iraunkorragoa eta herritarren mugikortasuna erraztuko dituela.

Euroeskualdeko Beka: ikasleen mugikortasuna bultzatzen

Euroeskualdeak ikasleen eta doktoregaien mugikortasun akademikoa sustatzeko beka-programa berri bat onartu du, 60.000 euroko diru-laguntzarekin. Programaren helburua unibertsitate trukeak aberastea eta ikasleek mugaz gaindiko prestakuntza eskuratzea da.