Atharratzeko plazan, lekukoa eramaten lehenak Euskal Irratietako langile eta laguntzaileak izanen gara, Ipar Euskal Herrian euskarazko kazetaritza egiten eguneroko lana ospatuz.

Martxoaren 19an Atharratzetik abiatuko da Korrika, martxoaren 29an Bilbora iristeko. Abiatze egunean programazio berezia izanen dugu Euskal Irratietan Atharratzetik goizeko 10:00etan hasirik, Korrika Xiberotik abiatzeak bertan eragin duena aipagai izanen dugularik eguerdi arte, Atharratzen izanen den giroa kontatzearekin batera. 12:00tatik 13:00etara, Ondaiziela emankizun berezia eskainiko dugu, eta 14:00tatik landa, Arrosa sareko irratiek elkarlanean eginen dugu Zebrabidea magazina, gonbidatu andanarekin, baita Euskal Irratientzat, Naiz Irratiarentzat eta Arrosa sarearentzat Korrika jarraituko duten kazetariekin ere. 15:30ean Korrika abiatzearekin batera hitza Euskal Irratien autoan izanen diren lankideek hartuko dute, eta, ohikoa denez, Korrika Ipar Euskal Herrian dabilen artean ere zuzeneko jarraipena eginen diogu gure antenetan.