Eguzki-panelak, hondakin organikoen metanizaziotik sortutako beroketa eta berrerabilitako materialak: horiek dira Canopiako gunean sortu den eraikin berriak dituen ezaugarri nagusiak. Bil Ta Garbi eta Euskal Hirigune Elkargoaren langileak bertan bilduko dira hemendik aitzina, espazio partekatu eta energia gutxiko batean.

Eraikinaren helburua da lan baldintzak hobetzea, zerbitzu publikoaren sinergiak sendotzea eta trantsizio ekologikoaren norabidean urrats eraginkorrak ematea. Martine Bisautak —Euskal Hirigune Elkargoko lehendakariorde eta Bil Ta Garbiko lehendakaria— adierazi duenez, “trantsizioan eraikitzea posible da”, nahiz eta Frantziako Estatuaren politiketan koherentziarik ikusten ez duen.


Bestalde, 2023an ezarritako bilketa-erreformak emaitza onak eman ditu: bi urtean, %35 handitu da ontzi eta paperen birziklapena, eta lehen aldiz, 104 kilo bildu dira urtero biztanle bakoitzeko. Aldi berean, zabor arruntaren kopurua 10.500 tonatan murriztu da —Ipar Euskal Herriko hainbat eskualdek urte osoan sortzen duten zaborraren parekoa.