Maiatzaren 17an, Homofobiaren eta Transfobiaren Aurkako Nazioarteko Eguna.

60 herrialde baino gehiagotan ospatzen den data honek gogorarazten du Osasunaren Mundu Erakundeak 1990eko maiatzaren 17an hartu zuen erabakia: homosexualitatea jada ez hartzea gaitz mental gisa.

Ordutik, egun honek aukera ematen du lesbianek, gayek, bisexualek, transgeneroek, intersexualek eta, oro har, orientazio afektibo, identitate edo genero-adierazpen ezberdinak dituzten pertsona guztiek pairatzen dituzten indarkeria eta diskriminazioak ikusgarri egiteko.

Baiona, Donibane Lohizune, Miarritze, Hazparne, Ziburu edo/ta Uztaritzeko herriko etxeek eguna sinbolikoki markatuko dute

Ipar Euskal Herrian ere, hainbat herriko etxek egun hau ekimen sinbolikoen bidez markatuko dute: eraikinak argituz edo/ta ortzadarraren koloreko banderak zintzilik ezarriz. Keinu garrantzitsuak dira, LGBTI+ pertsonentzat inklusiboak direlako eta gizarte osoarentzat baliagarriak erakusteko.

Dei egiten dute ere maiatzaren 17an, igandea, arratsaldeko 18:00etan Baionako Herriko Etxearen aitzinean elkarretaratze batera etortzeko, honako helburu hauekin:

• Gure lurraldean dauden LGBTI+fobien errealitatea agerian uzteko.

• Oraindik ere gehiegi presente diren indarkeria eta diskriminazioak ikusgarri egiteko.

• Frantziako Gobernuari fermuki galdetzeko gaitzespen adierazpenetatik harago joan eta beharrezko neurri zehatzak har ditzan.

LGBT+fobien inguruko inkesta ere abiaraziko du Les Bascos elkarteak

Urte betekoa izanen da. Inkesta honen helburua da LGBT+ pertsonek tokian bertan jasaten dituzten diskriminazioak, indarkeriak, irainak, bazterketak edo erasoak dokumentatzea, espazio publikoan, lanean, familian, ikasketetan, aisialdian edo osasun-zerbitzuetako sarbidean gertatzen direnak barne. Tokiko datuen eskasiaren parean, ekimen hau tresna ezinbestekoa da gure lurraldeetan LGBT+fobien errealitatea hobeki neurtzeko, oraindik maizegi isilarazten diren egoerak ikusgarri egiteko eta prebentzio, laguntza eta sentsibilizazio ekintzak indartzeko.