Prefetak Lexantzüko eta Itsasuko herriaren kontrako prozedura abiatu Euskararen aitortza ofiziala bozkatzeagatik. Arratsalde huntan Egoitz Urrutikoetxeak Lexantzüko auzapezak eta Mikel hiribarren jakinarazi daukute Prefetaren berri ukan zutela, Lexantzün atzo, Itsasun gaur berean.

Buruilaren 2an Lexantzüko hautetsiek bozkatu zuten Euskararen ofizialki onartzea lurraldeko hizkuntza gisa, Frantsesa bezala. Itsasun, uztailaren 23an zuten bozkatu Euskararen aldeko deliberoa, Sarako herriarena modelotzat hartuz. Simon Fetet prefetak errekurtsoak pausatu ditu auzitegi administratiboan bi herrien kontra.

Lexantzüko herriari helarazi dakon gutunean, azpimarratzen du bere ustez herriko etxeak ez duela deliberatzen ahal bi hizkuntzen arteko berdintasun juridikoari buruz, eta engaiamendu politiko bat erakusten duela, zerbitzu publikoek neutroak izan behar dutelarik.

4 dira beraz Prefetaren errekurtsoa ukan duten herriak: Baiona, Sara, Lexantzü eta Itsasu.