Gero eta denbora gutiago irauten dute lehen ministroek Frantzian, gaur goizean, postuan 26 egun egin eta gero, dimisioa eman baitu Sébastien Lecornuk. "Ez dira beharrezko baldintzak ematen lehen ministro gisara segi dezadan" erran du goizeko hamaikak aitzin Lecornuk Matignongo hotelean egindako agerraldian.

Bere gobernuko ministroak barda arratsean izendatu eta oren gutxira, lehen ministroak dimisioa mahai gainean pausatu dio frantses presidenteari, ezin duelako aitzina egin gehiengorik gabe, eta zentsura mozioaren arriskuak gero eta indar gehiago hartu baitu azken orenetan, aitzinkontuaren negoziaketek ez baitute aitzina egin oposizioko alderdi politikoekin.

Erreakzioak berehala heldu dira: eskuin muturrak, legebiltzarraren desegitea galdegin du berehala, eta LFItik Emmanuel Macron jotzen dute egoeraren hobendun, eta hauteskunde presidentzialak galdegiten. Honek bi aukera ditu orain: batetik, Lehen Ministro berri bat izendatzea, iazko legebiltzarreko bozetatik laugarrena litzakeena. Bestetik, Asanblea Nazionala desegitea eta bozetara deitzea. Hain zuzen, Lecornu bihar zen han politika orokorreko diskurtsoan mintzatzekoa.