Urruñako eta Senpereko eskualdeetako laborariek parte hartu dute mobilizazioan. Traktoreak bat bestearen gibeletik jarriz, auto metaketa luzeak sortu dituzte Donibane Lohizune arte, eguerdi irian. Ez zen sindikatuen banderolarik ikusi, eta parte-hartzaileak A64ko blokeo gunera joaterik ez zuten laborariak ziren, autobidea okupatzen baitute egunotan Coordination Rurale 64 eta ELB sindikatuek. Hala ere, arratsaldeko 16:30ak aldera, haietako batzuk Beskoitze aldera hurbilduko direla erabaki dute.

🔴 Donibane Lohizuneko zubia blokatu dute Hego Lapurdiko 50 traktorek, behien DNK eritasunari loturiko arauen «desmasia» eta «sarraskia» salatzeko.

Beskoitzera abiatuko dira haietako batzuk, A64 autopistako blokatzera. Biharko Prefetarekin bilkura lortu dute. pic.twitter.com/GuNTE60B69

— Euskal Irratiak (@euskalirratiak) December 14, 2025

Manifestazioa giro lasaian egin da, nahiz eta trafikoan zenbait traba sortu dituen. Eguerdi inguruan, karabanak geldialdia egin du Donibane Lohizuneko irteeran. Orduan, Jendarmeria bertaratu da. Ondoren, traktoreak hirigunera abiatu dira, eta horrek ere zirkulazio arazoak eragin ditu.

Aldi berean, A64 autobideko blokeoak jarraitu du igande honetan ere, laborariek adierazi dute ez dutela kanpalekua altxatuko Gobernuak dermatosiaren gaitza agertzen denean behi tropa osoa hiltzeko protokoloa indarrean mantentzen duen bitartean.

Larunbat arratsaldean, Pirinio Atlantikoetako prefeta bi orenez bildu zen Coordination Rurale sindikatuko ordezkariekin. Hauek eskatu zioten, haien aldarrikapenak hilketa selektiboari buruz Ministerioari helarazteko. Prefetak, astelehen arratsaldean Pauen Confédération Paysanne eta ELB sindikatuko ordezkariekin bilkura egitekoa du.