Ostiral goiz honetan egin den bilkurak emaitza baikorrak eman zituen. Jakinarazi zaie aurten zientzietako azterketa brebetan euskaraz egiteko aukera irekiko zaiela eskola eredu guztiei aurten. Orain arte Seaskak zuen aukera hori. Hautua izango dute beraz eskola pribatu katoliko eta publikoetako ikasleek euskaraz pasatzeko proba.
Horrez gain, errektoreak proposatu die Baionako hiru eskola publikotan elebitasuna proposatzea gurasoei. Elebidun eta murgiltze sailek "emaitza hobeak" dituztela azpimarratu du errektoreak. Ipar Baionan beraz esperimentazio gisa Citadelle, Cavailles eta hirugarren eskola batean galdera eginen zaie gurasoei.

Baxoaren gaian, EEPk eta tokiko hautetsiek eskatu diote errektoreari "tokiko hizkuntzen ibilbide berezi" bat sortzeko aukera aztertu dezan. Lehenean matematikak eta ahozko handia partez euskaraz pasatzeko posibilitatea emateko. Baina baxoaren gaia hezkuntza ministerioaren esku dela erantzun die Jean Marc Huart-ek.

Hala ere, Antton Kurutxarri Euskararen Erakunde Publikoko presidente ordea baikorra atera da bilkuratik, dionaz "Parean ukan dugu gizon bat dosierra ezagutzen duena eta prest dena lanean hartzeko."