Inkuba sarea estrenatu dute joan den ostiralean Heletan, Hazitegia lantokian. Hiru egiturek bultzatu dute  proiektua, Euskadiko Azti ikerketa zentroak, Nafarroako lntia enpresak eta Heletako Agour enpresak. Sare horrek hazkurri industriako tokiko enpresa berri eta berritzaileak langundu nahi ditu. Mugaz gaindiko proiektua izanki, Euro-eskualdearen babesa bildu du ekinbideak. Startup enpresekin partaidetzak izenpetu aitzin, urte eta erdiko epea hartuko dute Inkuba sarea egonkortu eta egituratzeko.

Hiru hamarkada bete ditu laborantza biologiko, ekonomo, autonomo eta solidarioaren aldeko eklateak. Bi etxalderekin 1993an abiatu zen BLE Biharko Lurraren Elkarteak, 350 kide zenbatzen ditu gaur egun. Urtemugarekin bate ginez, biltzar nagusia egin du BLEk Donoztirin (Nafarroa Beherea), 90 kideren presentziarekin. Hainbat ekimen aitzinikusi dituzte heldu diren hilabeteetarako. Lehena apirilaren 30ean izanen da; elkarteko 22 etxalderen bisita proposatuko dute. Tomas Erguy BLEko koordinatzailea, izan da gaurko gonbita Euskal Irratietan.

Ostegunean hasiko da xingar feria Baionan. Urtero bezala, 200.000 pertsona inguru goaitatzen dituzte antolatzaileek, eta horrek segurtasun neurri zorrotzak galdegiten ditu bestaren esparruan. Haatik, Frantzian bizi den egoera sozial gatazkatsuaren testuinguruan, CRS polizia brigada gutxiago igorriko dituzte aurten Baionara. Hori dela eta, herriko etxeak ostatuak oren bat lehenago hesteko deliberoa hartu du. Erabakiak, ordea, ostalarien ezinegona piztu du, diru galtze handia ukanen dutela salatu baitute. Kasu, ostalariak kexu kolektibokoen arabera, deliberoa «berandu eta adosmenik gabe» hartu du Baionako herriko etxeak. Inflazio eta prezio emendatzeen ingurugiroan, haien usaiako irabazien galtzeaz ohartarazi dute merkatariek.

Iparraldeko euskalgintzako eragileak sustatzeko, EEP Euskararen Erakunde publikoak eta Eusko Jaurlaritzak abantsu bi milioi euroko funtsa eratu dute. Hitzarmena ez da usaiaz kanpokoa; izan ere, badira hamasei urte elkarlan hori berresten dutela urtero. Aurten, Eusko Jaurlaritzak 400.000 euro eskaini ditu, eta 1,5 milioi EEPk. Jakin, heldu den urtean, EEPren egitura berritzekotan dela, bost urtero bezala. Gainera, aitzinkontuak eta egitura bera emendatzeko negoziaketak ireki beharko ditu frantses Estatuarekin. Parada izanen da euskararen inguruko eragile ezberdinek bizi dituzten zailtasunak aitzinean jartzeko. Antton Kurutxarri EEPko presidenteak eta Miren Dobaran Eusko Jaurlaritzako hizkuntza politiken idazkari-ordeak ageraldi bateratua egin dute Baionan.