Inxauzetako solasaldietan etxebizitzen Frantziako ministroak baieztatu zuen Euskal hirigune elkargoan aplikatzen ahalko zela alokairuen mugatzea, tentsio pean diren 24 herrietan. Haatik, espero dute ere fiskalitatea aldatuko dela mublatu turistikoei doakienez. Gaur egun, abantaila gehiago baitute zergen aldetik, mublatu turistikoen jabeek, urte osoan alokatzen dutenek baino. Gai hori barnatu beharko lukete Frantziako legebiltzarrean, Finantza legea eztabaidatuko denean, heldu den urrian. Euskal Irratietan mintzatu dira Iñaki Etxaniz laugarren hautesbarrutiko diputatua, eta ALDA kolektiboko Xebax Christy.

Olha etxaldeko okupazioa bertan behera uztea erabaki dute. Atzo goizean bi manifestaldi iragan ziren Baionan eta Donibane Lohizunen, preseski etxalde horren salmenta salatzeko. Baina ikusiz salmenta egina dela eta politikoengandik sustengu eskasia dutela, okupatzaileek indarrak beste kasuetan jartzea nahiago dute. Orotara berrehun pertsona mobilizatu dira Baionan eta Donibane Lohitzunen eta berrogei traktore ikusi dira. Okupazioa utzi badute ere Olha etxaldeko lurrak «gune natural sentsible» gisa sailkatzeko desmartxa abiatu dute.

Hiru hamarkadez Translatines festibalak bazterrak inarrosi zituen antzerkiaren munduan Baionan. Chimères antzerki taldeak antolaturik, mundu mailako 250 antzerki talde jinarazi ziren 1981 eta 2014 artean, bereziki Hego Amerikatik. Mundu mailan fama handia zuten taldeak hurbildu ziren Lapurdiko hiriburura, horien artean, La Fura dels Baus, Els joglers edo Teatro de los Andes. Ibilbide hori blaioan emateko dokumental bat prestatzen ari dira Nadine Perez filmegilea eta Jean-François Hautin. Heldu den urtean argitaratu beharko litzateke. Anartean diru bilketa bat abian eman dute proarti.fr gunean.

Emazte pilotari profesionalen arteko partida antolatu dute Biarriztarrak eta Ados Pilota elkarteek, astearte arrats huntan, Miarritzeko Plaza Berri ezker paretan, arratseko 20:30etan. Hego Euskal Herrian, hamairu emaztek kontratu profesionala izenpetu dute Ados Pilota elkartearekin. Horri esker, plaza geroz eta gehiago egiten hasi dira esku huskako jokalari hauek, bereziki udako herriko besten kari. Miarritzeko zoingehiagokan, Iera Agirre Iturriaga eta Maite Ruiz de Larramendi lehiatuko dira batetik, eta Ainhoa Ruiz de Infante eta Olatz Ruiz de Larramendi bestetik. Bururatzeko, Quintana – Bryan eta Tranoy – Ibarguren bikoteen arteko pala motzeko partidaz gozatzeko aukera izanen da. Iera Agirre pilotariarekin solastatu gara Euskal Irratietan, Goiz Berri saioan.