Neguan hetsirik diren igerilekuak, udako beroekin berpizten dira. Barnealdean, orotara, sei igerileku nagusi badira Maulen, Donibane Garazin, Hazparnen, Kanbon, Donapaleun eta Bidaxunen. Uda oroz, kluben arteko lehiaketa abiatzen dute, eta aurten ere, Maule doa aitzinean. Ipar Euskal Herriko txapelketaren finala asteazken honetan jokatuko da Kanbon. Mauleko igerilekuko kide den Beñat Cazanave:
«Nun da Popo?». Hara lau hamarkada beranduago, dilidan den galdera. 1983ko agorrilaren 7an Leoneko akanpalekuan Iparretarrak erakundeko lau kidek tiroketa izan zuten frantses poliziarekin. Tiroketa horretan, polizia bat hil eta beste bat zauritu zen. Liskarretik ihes egitea erdietsi zuten talde armatuko hiru militantek, baina Jean Louis "Popo" Larre kidea giblean gelditu eta desagertu egin zen. Filipe Bidart, Iparretarrak taldeko kide historikoak haien borrokaz argipenak eman dizkigu, eta Popo Larreren desagerpena nola bizi izan zuen azaldu digu:
Zortzi hilabetez bildu dira mehaindarrak, sasi kabalkada moduko baten prestatzeko. Dantza eta kantuen artetik, David Ondartsek idatzitako antzezlanak Mehaineko herritarren ttikitako oroitzapenak biltzen ditu. Proiektua herrittarrak euskararen inguruan biltzeko eta hartu emanak azkartzeko estakurua izan da. Ikusgarria agorrilaren 13 eta 15ean eskainiko dute herriko plazan.
Hitza-hitz festibalaren bigarren edizioa ospatuko da Maulen, irailaren 22 eta 23an. Aurten ere eskaintza musikal anitza hitzeman dute antolatzaileek. Taula gainean izanen dira Ludwig von 88, Sidi Wacho, Vandal, Marta y Herbass, The Titanians, Ondubground, Mandidextrous, Les Vulves Assassines eta Ashkabad taldeak.
Pastoral berri bat bidean da Xarnegu eskualdean. Ideiak herritar anitz mugiarazi ditu, eta dagoeneko, ehun parte hartzaile bildu dituzte. Inkisizioak sorgintzat hartu eta jazarri zuen Inexa Gaxen emazte bastidarraren istoria hartu dute gai gisa. Eskualde horretan, euskararekin batera gaskoiera ere entzun daitekeenez, bi hizkuntzei eginen diete leku antzezlanean. Testua Itxaro Bordak idatzi die, eta orain Ivan Bareyrekin elkarlanean arituko dira obra elebidunean moldatzeko. Heldu den urtean estreinatuko dute obra Bastidan ekainaren 15 eta 16an, eta ondotik Bardozen emanen dute irailaren 22 eta 23an. Pantxika Urruti antolatzailea izan da Euskal Irratietako gomita, Goiz Berri saioan:
Senpereko Olha etxaldea, ororen buru, saldua izan da. Duela aste batzuetatik ELB sindikatuak eta Lurzaindiak gunea okupatzen zuten, Senpertarrak nahiz Ostia kolektiboko kideekin batera. Salmenta salatu dute Alexis Inchauspé notarioaren bulegoaren kanpoaldean, eta laborantza lurren espekulazioa laguntzen duela deitoratu diote. Momentuz, etxaldearen okupazio ekintza mantenduko dute kolektiboek.
Marie Toussaint, Europe Ecologie les Verts alderdiko europarlamentaria Donibane Lohizuneko Lafitenia itsas bazterrean izan da asteazken goizean. Hura izanen da talde ekologistako zeerenda-burua 2024ko Europako Legebiltzarreko hauteskundeetan. Surfrider Foundation elkartearen laguntzarekin, ostreopsis itsas belarren presentzia eta uraren kalitatea aztertu dute. Klima aldaketak landare espezie berriak sorrarazi ditu euskal kostaldean.
Ez da argi nor izanen den Espainiako Gobernuko presidente berria. Uztailaren 23ko hauteskunde orokorretan, eskuineko Alderdi Popularra izan zen garaile, baina; eskuin muturreko diputatuen babesa bildurik ere, gehiengo osorik ez du erdietsi. Xantza handiena, beraz, PSOE alderdiko Pedro Sanchez luke. Haatik, ezkerreko alderdi guzien babesa beharko luke, talde independentsistenekin batera. Ion Ansa politologoa izan da Euskal Irratietako gomita, Goiz Berri saioan:
Zenbakiak ez dira behin betikoak baina 1,6 milioi pertsona izan direla Baionako bestetan adierazi du Jean René Etxegarai auzapezak; hots, iaz baino %10 bisitari gehiago. Horrekin batera 550 polizia eta 350 sokorritzailek parte hartu dute segurtasun dispositiboan. Orotara 490 salaketa izan dira lapurretengatik eta 36 interpelaziotatik, 28 atxiloketa izan dira. Horietan paperik gabeko bi atzerritar, erretentzio zentrora eraman dituztenak eta beste bat Frantziako lurraldetik joateko obligazioa ezarri diotena. Gainera, hiru pertsona espetxeratu dituzte ebasketengatik. Poliziak kasik hiru mila alkolemia kontrol egin ditu, eta horietatik 75 pertsonek eman dute positibo alkoholean eta zazpik drogetan. Horrez gain, lau bortxaketa kasu izan dira eta horietarik batek jada salaketa pausatu du polizia-etxean. Bestalde, kasik hil arte kolpatua izan zen gizona; oraino koman segitzen du Baionako ospitalean; hiru erasotzaileak xerkatzeko lanetan segitzen du poliziak.
