Urte bukaera bururatuko dira Angelu eta Senpere artean, Errobi eta Helbarruneko ur lantegien arteko interkonesio lanak. Ur eskasi lanjeraren aitzinean, lotura horri esker 13.000 metro kubiko ur garraiatzen ahalko dira egunero, Hego Lapurdi aldera, eta 8.000 metro kubiko iparrera buruz. Nolanahi ere, Euskal Hirigune Elkargoak argi du sistema horrek ez duela dena konponduko. Udako idorte sasoiari begira, sentsibilizazio kanpaina azkartuko du Elkargoak, herritarrek ur gutxiago kontsumitzeko xedez. Edateko uraren prezioaren emendatzea ere ezin bestekoa izanen dela ohartarazi dute.

Ur eskasari nola egokitu laborantzan? Azken urte eta hilabeteetan idortea areagotu da aldaketa klimatikoaren ondorioz. Hori dela eta, landa eremuak egokitzeko beharretan izan dira laborari zenbait. Labore mota berri batzuk zabaltzen ari dira, adibidez sorgoa edo basartoa. Horri loturik ere, ura biltzeko eta banatzeko manerak eraldatzen ari dira, anitzetan pribatizaziora jotzen ari delarik. Preseski, uraren kudeaketa eta laborantzaren egokitzea hartu dugu hizpide Goiz Berri saioan Txomin Elosegi Euskal Herriko Laborantza Ganbarako agronomia eta landare-hazkuntza teknikaria.

Luzien Etxezarreta omenduko du aurten Ziburuko euskal disko eta liburu azokak, euskal literaturaren alde eta Maiatz argitaletxean egindako lana eskertzeko. Ekainaren 3an ospatuko da euskara hutsezko disko eta liburu azoka Ziburun. Baltsan elkarteak eta Argia hedabideak antolatuta 36 argitaletxe izanen dira present. Urtez urte argitaletxeen presentzia areagotuz, indartsu eta berrikuntzekin ospatuko da laugarren edizioa.

Mila lagun bildu zituen larunbatean Irunen Osasun Bidasoa plataformak. Bidasoaldeko osasungintza publikoaren «okertze progresiboaren aitzinean» arrapostu bat galdegiten diote Eusko Jaurlaritzari. Osasun zerbitzuen gainbehera, hogei urteotako inbestizamendu eta aitzinikuspen faltaren ondorio dela diote. Izan ere, hiru hamarkadaz emendatu egin den Irun-Hondarribiko 80.000 biztanleen populazioari ez ezik, Bortzirietako 9.000 herritar eta Hego Lapurdiko 4.000 mugaz gaindiko langileri ere zerbitzu ematera pasa dira leku berririk gabe. Osasun zentro eskaxak eta zaharrak, mediku eta espezialista falta, eta horren ondorioz, hilabeteetako goiatatze-zerrendak eta diagnostiko atzerapen larriak ematen ari direla salatzen dute. Irungo hirugarren lehen arreta zentroa eraikitzea, eta Bidasoko ospitalea berritzea eta handitzea galdegiten dute.

Euskal Hedabideak elkartea osatzen duten Kanaldude, Euskal Irratiak, Kazeta.eus, Ipar Euskal Herriko Hitza eta Herria euskarazko hedabideak elkarlanean, “Euskal hedabideak lau haizeetara” saio berria eskaini dugu.

Proiektu andana bidean dira Bidarraiko herrian. Pundua egin dugu gaur Euskal Irratietako Goizberri saioan Jean Mixel Antxordoki auzapezarekin. Adinekoendako bizitegi partekatu bat eraikitzear dira, Bidarrai eta inguruko xaharrendako. Egitura horrek gainera langile bat ukanen du. Horrez gain, Kanalduderekin batera, ikus entzunezko polo bat eta enpresa mintegi bat sortze bidean dira Onddoenia eraikinean. Bestalde, euskarazko haurtzaindegi berri bat sortu nahi dute herrian. Jean Mixel Antxordoki Bidarraiko auzapezak eman dizkigu xehetasunak, Goiz Berriko gonbitaren tartean.

Berriki sortu den Zeramika Garazi elkarteak, zeramika merkatua antolatu du maiatzaren 6tik 7rat Donibane Garazin. Ipar Euskal Herriari doakionez, badu 25 urte Bastidan gisa hortako eguna antolatzen dela eta Zeramika Garazi elkarteko Paul Carriquiryren erranetan beharrezkoa zen barnealdera ontzigileak gonbidatzea. Merkatu estalian 30 bat zeramika egile elkartu dituzte toki ezberdinetarik jinak eta estilo guzietarik. Asteburu hau kausiturik, heldu den udaberrirako hitzordua luzatu dute.

Hainbat herritarrek bat egin dute iragan igandean, Angeuko Juzan oihanaren suntsiketa salatzeko. Euskal Hirigune Elkargoak “Arkinova” aktibitate eremua handitu nahi luke oihanaren lurzoruaren gainean. Proiektuak 22 hektarea hartuko lituzke, erdia gune naturalaren gainean. Horrek sorraraziko lukeen kalte ekologikoak, eta Angeluko azken laborantza lurren desegiteak herritar anitzen ukoa eragin du. Planak aitzina eginen balu, hiru gune heze hunkiak liratezke, baratzezain zenbait kanporatuak, eta hirurogei animalia eta landare espezie kaltetuak. Claude Olive Angeluko auzapeza elkarretaratzera hurbildu da herritarrekin mintzatu asmoz, eta herriko kontseiluan maiatzaren 25ean proiektua geldiarazteko helegite bat proposatuko duela iragarri du.

Lokal berria eskuratzearekin batera, epaiketa izanen du Ttattola gaztetxeko kide batek, 2021eko agorrilean Hazparneko etxe huts batenan egindako okupazio ekintzagatik. Maiatzaren 25ean agertu beharko da Baionako auzitegian. Gaztetxe okupatutik kanporatuak izan zirelarik, bi gazte jendarmeriara konbokatuak izan ziren; preseski, horietarik bat da orain epaituko dutena. Aintzinetik erdietsi ez zutena, ondotik erreusitu dute. Isabelle Pargade, Hazparneko auzapezak egoitza bat hitzeman die, mementuan obretan dena. Lehentasunez baliatzeko aukera izanen badute ere, beste eragile batzuekin partekatu beharko dute. Iulen Vrignon gaztetxeko kidea eta Isabelle Pargade auzapeza, hurrenez hurren: