Mintzalasai festibalaren hamabigarren edizioa ospatuko da irailaren 17tik 24ra. Zazpi egunez 50 jarduera, 20 gune, 30 elkarte eta 70 laguntzaile ibilduko ditu hitzordu horrek Baionan eta Miarritzen. Usaian bezala, egun bakoitza gai baten inguruan ardaztuko da; astelehena kirol eguna izanen da, asteartea gogoeta eguna, asteazkena haurren eguna, osteguna sukaldaritzarena eta ostirala kultura eta eztabaidarena. Aste hondarrean gailurrera helduko da. Larunbatean, Glisseguna izanen da Angelun eta igandean Mintzalasai festibalaren egun nagusia Miarritzeko Marion aintziran. Programa guztia eskuragarri duzue mintzalasai.eus webgunean.

Kinka txarrean da egun Mauleko ospitalea,eta azken urteetako zuzendaritza aldaketek ez dute egoera hobetu. Joan den aste hondarrean ospitalearen geroaz mahai-ingurua antolatu zuen Xiberoako EH Bai koalizioaren taldeak. Bertan, PS alderdiko Frederique Espagnac senataria eta Iñaki Etxaniz diputatuak Lapurdi eta Baxe nafarroako ospitaleekin bateratzearen alde agertu ziren. Arnaud Bourdé Donapauleko ospitaleko zaintza kontseiluko buruaren iritziz, ordea, norekin lotu pentsatu aitzin, «beharrezkoa da Mualeko ospitalearen funtzioa definitzea, lurraldeko ospitale taldea dadin ahuldu». Izan ere, kontuan hartu behar da bi lurraldeetako ospitale taldeek desberditansunak dituztela: Pauekoan, Oloroe eta Orthezeko ospitaleen kudeaketa eta bideragarritasunarekin arrangurak emendatuz doaz. Aldiz, Lapurdi eta Baxe Nafarroako ospitale taldean, aiseago igortzen ahal dituzte medikuak barnealdera.

Badu 15 urte Hergaraiko sei herrietako herritarrek Hergarai Bizi elkartea sortu zutela. Orain arte Ahatsa, Behorlegi, Duzunaritze, Lekunberri eta Mendibeko herritarrek parte hartzen zuten bereziki, baina aurten Aintzileko gazte talde bat ere gehitu da egitasmora. Bi urtero herriz aldatzen dute, eta aurten, Duzunaritze hautatu dute. Irailaren 16an,  Ttutturu Trail lasterketa izanen da eta biharamunean, feira, gasna lehiaketa, dantza eta musika. Aurten, omenaldi berezia eginen diote Bernat Etxepare idazleari, sortzez duzunariztarra baitzen. Paxkal Negelouart eta Maider Genard Hergarai Bizi elkarteko bi presidentekideak izan dira Goiz Berri saioko gomitak.

Jean Paul Lenoble zuzendari ohia zigortu dute «mespretxu eta jazarpen jarraituagatik». Epaileak lau hilabeteko espetxe zigorra gibelapenarekin, 3.000 euroko isuna eta langile bakotsari 2.500 euroko kalte-ordainak pagatzera zigortu du. Lehen Nid Marin eta orain 'Haiekin' berrizendatutako zentro pribatua, 25 haur autista eta adimen urriko 45 helduen bizitoki da gaur egun. Okzitaniako ASEI elkarteak hartu zuen zentro pribatuaren kudeaketa, eta 2017an Jean Paul Lenoble zuzendaria sartu zelarik hasi ziren jazarpenak.

Lehen udako unibertsitateak deitzen zituztenak, ostiral arrats honetako hitzordu batekin hasiko dira: 'Estaturik gabeko nazioak, aitortza politikoaren bila' izenburuarekin. Lau parte hartzaile izanen dira, Bretainiatik, Kortsikatik, Kanakiatik eta Euskal Herritik. Biharamunean Baigorrira salto eginen dute EH Baien eskolek, bi eguneko egitarauarekin. Senatuko eta herrietako hauteskundeak izanen dituzte hizpide.

Buruilaren 24an iraganen dira frantses Senatuko hauteskundeak. Ipar Euskal Herrian eta Biarnon bederatzi hautagaitza izanen dira lehian. Abertzaleek, aldiz, ez dute zerrendarik aurkeztu. EH Bai-k, Frédérique Espagnac senatorearen zerrendan sartu nahi izan zuen baina PS alderdiak atea hetsi zien. EAJ-PNB alderdiko hautetsien kasuan ere, oraino ez da argi nor babestuko duten. Bost ardatzetan oinarritu galdetegia igorri diete hautagaiei, eta laster hasiko dituzte lehen elkarrizketak. Gaur egun, jeltzaleek 25 hautetsi inguru dituzte Iparraldean, eta are indar handiago hartu dute Hirigune Elkargoan, Elgarrekin Herriarentzat talde politikoko bultzatzaile nagusi gisa. Peio Etxeleku Ipar buru Batzarreko presidentea izan da goiz Berri saioko gomita.

Garbitzeko eta farmaziako produktuak, zauriak garbitzeko alkola, konpresa esterilak, loturak edota biziraupenerako estalgiak. Produktu bilketa hasi du Baionako herriko etxeak Marokoko lurrikarako kaltetuei sustengua adierazteko. Ez dute jantzirik biltzen, farmaziako produktuak, zapatak eta ninientzat lehen beharreko produktuak baizik. Diru emaitzak ere egin daitezke Baionako herriko etxean txeke bidez. Maroko enbaxadarekin harremanetan dira, biltzen dituzten produktuak gero han nola banatu aztertzeko. Ipar Baionako CCAS zentro soziala astelehenetik ostiralera irekia da 9:00 - 12:00 eta 13:30 - 17.00 artean.

EELV berdeek beren zerrenda aurkeztu dute senatuko hauteskundeetarako. Julien Brunel izanen da zerrenda buru eta bigarren Alice Leiziagezahar. Ezkerreko zerrenda bateratu baten beharra entzun da luzaz baina azkenean ez da gauzatu. Frédérique Espagnac-ek azkenean beste kalkulu batzuk eginik, bere aldetik joatea erabaki duela eta ez dela adostasunik lortu adierazi dute ekologistek. Etorkizuneko hautagaiak direla azpimarratu dute, «tokiko proiektuak, herrian lan eta bizitzeko eskubidea, tokiko hizkuntzak, edota proiektu erraldoien kontrako borrokak» bultzatuko dituztela adierazi baitute.

Berrogei urtetik goitiko presondegi-zigorrak eta 45.000 euroko zigor ekonomikoak galdegiten dituzte 'Leioako 5entzat'. 2016an Leioako campusean (Bizkaia) egindako ikasle mobilizazio baten harira auzipetu zituzten gazteak, eta berriz seinalatu dute EHUren erantzukizuna. Zigor ekonomiko horiei buru egiteko Elkartasun Kutxa ireki dute, Helloaso plataforman. Auzipetutako bost gazteen eskualdeetan eta Leioako campusean eginen dituzte protestak. Baionan irailaren 23an izanen da, goizeko 11:00etan Baionako herriko etxe aitzinean.