Etxeen salmentarako, alokatzaileen kanporatze gero eta gehiago egiten dela salatu du Alda kolektiboak. Kanporatzeen ondorioz abiatu prozedura judizialak 228 ziren 2018an, eta 302 urte bat berantago. Prozeduren kopuru handia irudikatzeko, 300 etxebizitza inguratu dituzte ipar Baionan, Grand Basque aldean. Hainbat neurri eskatzen ditu Aldak alokatzaileak babestuak izan daitezen, hala nola, kanporatu aitzineko epearen luzapena. Etxebizitzaren arazoa salatzeko, apirilaren lehenean Baionan eginen den manifestaldian parte hartzeko deia luzatu du bidenabar.
Larhun mendi kaskora egunero heltzen den jende kopuru handia, hobeki kudeatzeko eta ordenatzeko, Pirinio Atlantikoetako Departamenduak, Nafarroako Gobernuak eta Euskal Hirigune Elkargoak proiektu iraunkor bat abian eman dute elkarrekin. Bisitarientzat zerbitzu hobeak eskaintzearekin batera, tokiko abeltzainen lan egiteko baldintza egokiak segurtatu eta inguramena zaintzea du ardatz egitasmoak. Hiru urterako proiektu horrek 2,6 milioi euroko aitzikondua ukanen du eta Europako Interreg POCTEFA promara aurkeztuko dute maiatzean.
Iragan uda biziki idorra izan zen, eta hainbat herritara kamioiez eraman behar izan zuten ur edangarria. Horri buru egiteko hainbat neurri hartu ditu Hirigune Elkargoak. 2028 urtea bitrate 40 milioi euro inbertituko ditu, eta ondoko 15 urteerako bide orri markatu du, 240 ekimen konkreturekin. Lan handietarik bat, lur azpitik hodiak pasaraztea izanen da. Angeluko oihana erre zelarik, Ondresetik ura ekarri zuten bezala, beste zentzuan ere gauza bera egitea ahalbidetuko luke horrek. Angelu Senpereko Helbarroneko ur puntu bati lotzeko lanak egiten ari dira, 13 milioi euroko gastuarekin. Ezpeleta eta Larresorotik ere gauza bera eginen dute Lexantzu eta Alozeraino. Hortaz gain, izan daitezkeen ur galtze txipiak ere hobeki kontrolatzearen beharra azpimarratu du Elkargoak. Jakin behar da, ur edangarriaren kontsumoaren %75 familiengandik heldu dela, %10 laborantzatik eta %25 turismotik. Covidaren ondotik ikusi da turismoa barnekalderuntz hedatu dela, hor ere kontrol hobea izan nahi du elkargoak. Bestalde, Bartzelonan egin zen bezala, itsasoko urari gatza kentzeko enpresa bat ere gogoetatzen ari dira. Ez oraingo, 2030 ingururako baizik, oraindik deus konkreturik gabe. Guzi hori eta gehiago burura eramaiteko, azken 5 urteetan elkargoak 100 milioi euro inguru aurreikusten zituen. Aurrekontua beste 8 milioi euroz igotzeko xedea du hemendik landa.
Liztor asiarren erasoen aitzinean, etxeko baratzeetan zepoak ezartzea aterabide egokia izan daiteke. hori dela eta, horiek nola sortu erakusteko tailerra antolatu du Makeako (Lapurdi) Ezti Etxeak. Duela hogei urte Europan zabaldu zen lezafin espezie bortitz hori, eta bertako erleak erasotzen ditu. Neguan habiak uzten dituzte liztor asiarren erreginak, eta lurpean gordetzen da urtarrila edo apirila arte. Ondotik, habi berriak sortzen hasten dira. Hori dela eta, une egokia da erreginak harrapatzeko. Ezti Etxek zeop sinpleak ezartzea aholkatzen du: plastikazko botila erdibitu bat, botila lepoa alderantziz ezarriz gainean eta barnean likido sukratua ezarriz. Tailerra astearte arratsaldean eginen dute, 20:00 orenetan Makeako Mindegia salan.
200 bat laborari elkartu dira suprefetura aitzinean, kamioi eta traktoreekin bidea blokatuz. Iazko idorteari aurre egiteko, Frantziako estatuak hamairu milioi euro banatuko ditu Departamenduko laborarien artean. Haatik, laborarien %30a kanpo gelditu da. Unean, 250 bat eskaera pausatu dira laguntza ukateko, baina guztiek ez dute diru kopuru bera ukanen FDSEA sindikatuak gaitzetsi duenez. Elgarretaratzera hurbildu da Jean René Etxegarai, Euskal Hirigune Elkargoko burua. Frantses Estatuak eskainiko ez duen laguntza Elkargoak emanen duela hitzeman du. Asteazkenean prefetarekin bilduko da laborarien ordezkaritza bat.
Pierre Loti, XIX. mendeko idazle, bidaiari eta Frantziako itsas-armadako kideaz Hendaian mintzaldia eskainiko da gaur arratsean Aizpea Leizaola antropologoak. Loti 1923ko ekainaren 10ean zendu zen Hendaian, duela ehun urte, eta bere libururik ezagunenak, frantsesez idatziriko "Ramuntxo" kontrabandistaren istorioak Iparralde guztia markatu du. Ipar Euskal Herriaren iruditegi exotiko eta kontserbadorea hedatu zuen Frantzian, eta turismo ainitz erakarriz. Aizpea Leizaolak sakon landu du Lotiren lana, eta Euskal Herriaz erakutsi nahi izan zuena:
Katakrak argitaletxearen "Puta zikinak" liburuaren kontra oldartu da CAPP Collectif Abolition Porno Prostitution kolektibo feminista Baionan, Elkar liburudendan. Juno Mac eta Molly Smith idatzi liburuaren azalak urratu eta «Prostituzioa: bezeroak, bortxatxaile hiltzaileak» dioten eranskailu batzuk ezarri dizkiete. Sexu langileen lekukotasunak biltzen ditu lan horrek. Katakrak argitaletxeak ekitzan salatu du, eta agiri baten bidez adierazi duenez «prostituzioaren aldeko eta kontrakoen arteko eztabaida, ez litzateke bide horretatik garatu behar».
Liburu berria aurkeztu du Eguzki Urteaga soziologoa eta Iparraldeko Eusko Ikaskuntzako lehendakariak: “La politique d’enseignement supérieur au Pays Basque” (L'Harmattan argitaletxea). Lan honen bidez Ipar Euskal Herrian campus propioa garatzeko jorratu den ibilbidea aztertu du Urteagak. Bere erranetan, UPPA Paueko eta Aturrialdeko Unibertsitateak, eta Euskal Hirigune Elkargoak, bakoitza bere aldetik, bide paraleloak egin dituzte erronka horri ekiteko. UPPAk 4.000tik 8.000 ikaslera emendatu nahi ditu Baiona eta Angelun dituen kanpusetako ikasle kopurua. Horretarako, 30 milioi euroko aitzinkondua ukanen du egitasmo hau burutzeko. Hirigune Elkargoak bere aldetik, 2025 urterako, 10.000 ikasle nahi lituzke goi ikasketak egiten. Horretarako ikasketa eskaintza handitzea eta lurralde orekari buru egitea nabarmendu dute. Hori dela eta, Xiberoan, erraterako, hiru urteko diplomatura bultzatuko du, UPPA-rein batera. Gaian sakontzeko parada eskaintzen du Eguzki Urteagaren azken lan honek.
Joan den abenduan hartu zuten deliberoa, kide eskasia eta kideen denbora eskasak eraginik. Azken urteetan egoerak hobera egin du Atharratze eta Barkoxen, haatik mediku eskasa nabari da oraino Maule-Lextarren. Preseski, mediku horiek ziren Xiberoako osasun langileen batzordearen eramaile nagusiak. 2019an sortu zuten, eta hirurogei partaide biltzera iritsi ziren. Desegiteko deliberoa iragan urte hondarrean hartu zuten, eta hilabete honetan, ororen buru, elkarteko hiru idazkariek beren tokia utzi dute. Max Dalier farmazialari ohia eta batzordeko azken arduradun izandakoa:
