Brebeta euskaraz bai baina ez denentzat. Murgiltze sistemako kolegioetako hirugarrenekoek aukera izanen dute euskaraz idazteko aurtendik goiti, ez besteek ordea. Martxoaren 17ko Pap Ndiaye Hezkuntza Ministroaren gutunean zehaztua da. Neurria, Seaskako ikasleei mugatua zaie. Alta, elebidun saileko haurrek, izan publikoan edo katolikoan, ainitzek euskaraz ikasten dituzte ikasgaiak. Hauek ezinen dute euskaraz pasa azterketa. Biga Bai eta Ikas-Bi elkarteko burasoek, neurria elebiduneko ikasleei hedatua izan dakien galdegin dute.

30 000 manifestari, 3 000 polizia eta 200 zauritu baino gehiago. Joan den asteburuan mobilizazio erraldoia antolatua zen Deux-Sèvres departamenduan ur-biltegien erainkuntzaren kontra. Aspalditik antolatua zen hitzordu horretara milaka manifestari hurbildu dira, ura atxikitzeko eginak diren erretentzio urtegiak gaitzesteko. Ingurumenaren eta laborantxaren aldetik zentzugabekeria dela defendatzen dute manifestariek. Istilu azkarrak izan dira poliziarekin. Bi aldetik zaurituak izan dira baina manifestarien artean 200 bat izan dira eta horietariko bat hil ala biziko egoeran da. Bertan izan den euskal herritarren artean da Hartzea Lopez Arana.

Hala dio, Euskal Hirigune Elkargoak azken hiru urteetan egin duen ikerketaren emaitza kezkagarriak. Xiberoako uhaitzaren heina ere %30 apalago da. Bestalde, elurra segidan urtzeak arrangura sortzen du ur azpiko erreserbak ez baitira behar bezala bete. Uda idorretik landa, neguak gisa berean segitu du. Hortaz puntu bat egiteko komite bat bildu da departamendu mailan. Heldu den uda zinez idorra baldin bada, jakin behar da ur baliatzean murrizketak izan daitezkeela.

Lau liburu berri aurkeztu ditu Maiatz argitaletxeak. Bi euskaraz eta beste bi frantsesez. Aritz Mutiozabalen 'Zetakak' olerki liburua, Xan Idiarten 'Nostalgia ez da salgai', bi hauek euskaraz eta Gaby Etchebarnen 'Ma vie avec les autres' eta Axularren 'Gero' obra ezagunaren frantsesesko itzulpena, Xabi Castorènek egina. lau liburuak Sarako biltzarrean aurkeztuko dituzte eta ilustratzaileak ere bertan izanen dira.

Etxebizitzen arazoari buru egiteko alternatibak landu nahi ditu Baionako herriko etxeak. Aniztasun sozialaren xarta bat proposatu nahi die etxebizitzaren inguruan lan egiten duten enpresa, eragile eta entitate ezberdinei, etxebizitza sozial kopurua %27tik %40ra emendatzeko. Jabegora heltzeko, etxeen %20aren metro karratuaren salneurria 4.200 eurotara murriztu nahi dute. Eta hutsik diren etxebizitzen %95a, lehen etxebizitza bilkarazi nahi dituzte. Xarta, apirilaren 5eko herriko kontseiluan aurkeztuko dute ofizialki.

Bagira ekimenak, abertzaletasunari hats berria eman nahi dio Iparraldean. Transmisio historikoa landu da lehen fasean. Aberri Egunetik goiti gogoeta berriak abiatuko ditu, bide-orri berri bat adosteko. Hirurogei urte dira frankismo odnoko lehen Aberri Eguna izan zenetik Itsasun, eta sinbolikoki erabaki da ospakizuna herri horretan kokatzea apirilaren 8 eta 9an. Aurten bi egunez, erakusketa, mintzaldi, zikiro edo kontzertu izanen dira.

Sarean da ‘Egungo Euskararen Hiztegia’, euskara modernoari buruz egin den hiztegi zehatz eta zabalena. Ibon Sarasola hizkuntzalariak egin du, 15 urteko lan gogorraren ondotik. Euskara-euskara hiztegi hau paperean argitaratuko balitz, 30 bat liburu beharko lituzke, hots, 16.000 orrialde. Ipar Euskal Herriko hitz andana atzeman daitezkz, gehienak Itxaro Bordaren lanetatik eta Herria aldizkaritik hartuak. Miren Azkarate katedradun eta euskaltzainak hiztegi hau aurkeztuko digu gaur Euskal Irratietan, goizeko 8etako berri sailetik landa.

Bederatzi urteren ondotik Donostian jokatuko du Baionako Aviron errugby taldeak. Paueko taldearen kontra lehiatuko da larunbat honetan, Reale Arena zelaian. Zuei urdinek sasoi zinez ederra egiten ari dira. Asier Altuna Donostiako Avironeko errugbilari ohia izan da Euskal Irratietako gomita, Goiz Berri saoian.

Arbolak loratzen, egunargia luzatzen eta Nafarroaren Eguna hurbiltzen. Heldu da Baxe Nafarroako udaberriko ekitaldi garrantzitsuenetarik bat. Aurtengo edizioaren aurkezpzna egin dute Basaizea Kultur Batasuneko kideek. Apirilaren 30ean ospatuko da. Usaian bezalako egitaraua aitzinikusi dute, eta hitzordu horren aitzinetik Kulturaldia prestatu dute. Lehen hitzordua apirilaren 13an izanen da Urepelen. 'Azken dantza Maisua' dokumentala emanen dute, eta hurrengo egunean, Popo Larre Iparretarrak (IK) erakundeko kidearen desagerpenaren urtemuga kari, 'Bolante baten historia' dokumentala emanen dute.