Euskara ofiziala den lurraldeetan ere, euskal hizkuntzaren kontrako eraso eta mespretxuak areagotu dira. Bereziki alor instituzionalean, herriko etxeen lan eskaintza publikoetan euskara eskakizunen kontra, eta administrazioan euskaraz jardutea ahalbidetzen duten erabakien kontrako oldartu dira hainbat epaile azken hilabeteetan. Ebazpen horiek euskara babesgabetasun juridikoan utzi dutela salatu dute euskalgintzako eragileek. Hori dela eta manifestaldi nazionala deitu dute Bilbon, azaroaren 4erako. Irati Iziar, Euskaltzaleen Topaguneko presidente berriarekin gai honetaz aritu gara Goiz Berri saioan.

SDOHE  Ura eta Obra Hidrolikoen Zainketarako Sinidikata, EAJko ordezkariak eta hautetsiak elkartu dira joan den ostiralean Baigorriko Xantienia zentral hidroelektrikoan, Estatuaren energia hidroelektrikoaren berritze normak zorrotzegiak direla salatzeko. Hamairu zentral hidroelektriko dira baimen berritzearen zain gaur egun Ipar Euskal Herrian.

Uda bukaeran, etxebizitza tentsiopean diren herri eta hirien zerrenda emendatzeko aukera ireki du frantses gobernuak. Hastapenetik zerrendan diren Lapurdi kostaldeko 24 herriei, beste hamaika gehitzen ahalko zaizkie. Herri horietan ere, tentsiopeko guneei dagokien konpentsazio legedia ezartzen ahalko da. Baina horrez gain, ze erran nahi du tentsiopeku gunean izatea? Xehetasunak galdegin dizkiogu Goiz Berri saioan Xebax Christy Alda kolektiboko bozeramaileari.

Bortu aldeko eskola bakarrenetarikoa da Larrainekoa. Hamazazpi haur hartzen ditu, eta iragan ikasturtetik, euskarazko murgiltze eredua ireki dute ama-eskolan. Egoitza berritzeko 600.000 euroko inbertsioa egin dute, Hirigune Elkargoaren, Eskualdearen, Departamenduaren, Estatuaren eta herriko etxearen partaidetzarekin. Estreinaldira hurbildu dira erakunde horietako ordezkariak, horien artean, Jean Rene Etchegaray, Rene Carrique, Jean Marc Baranthol, Iñaki Etchaniz diputatua, Frederique Espagnac senataria eta Marion Aoustin-Roth Olorueko suprefeta berria. Eskolari haren babesa eman diote, nahiz eta demografia apaltzearen ondorioz lanjerean izan daitekeen. Inguruko beste eskolak Basabürüko RPIan bildurik dira.

Pilotak Aldudeko ibarraren ukan duen inportantzia estakuru harturik, ibarraren azken hiru mendeak kondatzen dituen dokumentala ekoizten ari da Aldudarrak elkarteak. ‘Perkainen itzalean’ izenburua hautatu dute, Juan Martin Inda ‘Perkain’ pilotari handiaren oroimenez. Ibarreko adineko herritarren ahozko lekukotasunak, argazki zaharrak eta artxibategietako agiriak biltzen dihardute. Urte baten buruan estreinatuko dute Aldude ibarreko ate irekietan. Aldudarrak elkarteko Mikel Erramuzpe izan da Goiz Berri saioko gomita.

Hamaika ikasle hasi dira Unibertsitateko euskarazko kazetaritza formakuntzan. Ipar Euskal Herriko bederatzi hedabide euskaldun eta elebidunetan arituko dira lanean , unibertsitate ikasketekin aldizkatuz. Irailaren 18an abiatu zen programa EHUren, Bordeleko IJB kazetaritza eskolaren eta Paueko eta Aturrialdeko Unibertsitatearen eskutik. Klaseak Bilbon, Bordelen eta Baionan jasoko dituzte. Hiru entitateen arteko partaidetza ofizialki izenpetu zuten iragan ostiralean. Besteak beste, Euskal Irratietan, Berrian, France Bleun, Kazetan eta Kanalduden ariko dira ikasleak bi urtez.

Prefeturaren debekua debeku, Palestinari elkartasuna erakutsi diote Baionan. Herriko etxe aitzinetik jendea kanporatu, hainbat pertsona identifikatu eta pankarta eraman zuen Poliziak, Baionako suprefeturak mobilizazioa debekatu zuela erranez. Hala ere, mobilizazioa egin zuten Baionako karriketan barrena. Ipar Euskal Herriko Kontseilu Sozialistak, Palestinako herriari elkartasuna adierazteko, eta «Israelen ofentsiba militarra eta Mendebaldeko herrialdeen konplizitatea» salatzeko egin zuen deialdia. Gainera, «eskubide politikoen aldeko borrokari» azpimarra egin zioten antolatzaileek, Frantziako Estatuan debekatu eta erreprimitu diren Palestinaren aldeko protesten harira. Ipar Euskal Herriko Kontseilu Sozialistako Lur Renteria:

«Gaur egungo erritmoan segitzea euskara hiltzera kondenatzea litzateke». Horrela mintzatu da Euskal Konfederazioa Euskararen Erakunde Publikoaren egoitzaren aitzinean. Hizkuntz politika ausartagoa galdegin dio EEPri, euskal hiztunen emendatzea azkartzeko. Preseski, atzo izendatu dute Maider Beothegi Bardozeko auzapeza erankude horretako lehendakari. Sei urtez izanen da EEPren buruan. Haren ustez, EEPk politika ausarten bidea aspaldi hartua luke, eta horren adibide litzateke azken ikerketa soziolinguistikoak: «Azken uurteetan hiztun kopurua mantendu egin da». Euskal Konfederazioak, ordea, baliabide eta diru laguntza eskasegiak direla deritzo.

Eneko Gorri (Euskal Konfderazioa):

Maider Beothegi (EEP):

Azkarki kolpatu du Iparraldea behien eritasun hemorragikoak. 150 kilometroko eremuan, 3.500 herritan kabalak barneetan atxikitzeko manua ukan dute etxaldeek. Mementoan, gainera, Hego eta Ipar Euskal Herri arteko garraioa gelditua da, baita Espainia eta Italiako mugetan ere. Horrek eragin dituen galera ekonomikoei, albaitarien eta sendagaien gastua gehitu behar zaio. Gaurko Goiz Berriko gomita Andde Uthurriague Ozazeko hazlea izan da.