Kontsumitzen dugun elektrizitatearen %6a baizik ez da ekoizten Iparraldean. Arazo hori arintzeko xedez, I-Ener sozietateak panel fotovoltaiko parkeak garatu nahi ditu hondarkindegietan. Lehen aldiko bat sortuko dute Senpereko Zaluaga hondarkinegian, 2024 urte ondarreko prest egonen dena. Abantsu hiru hektareako hedadura ukanen du parkeak. Patxi Bergara, I-ener sozietatearen presidentea elkarriketatu dute Euskal Irratiek.
Xiberoako ekonomia laguntzen duen ODACE egiturak lau ardatz nagusi finkatu ditu heldu den urteei begira, egin berri duen biltzar nagusian: Langile eskasari aterabidea atxemaitea, lan eremuak xekatzea, enpresen transmisioa segurtatzea eta formakuntza garatzea lizeo ezberdinetan. Bestalde, Sohütako lizeoan XIBETEK izeneko plataforma teknologikoa plantan ezarriko du 2024ean. Hortara jiten ahalko dira bai lizeoko irakasle, ingeniari edo teknologia berri eta robotetan formakuntza hobetu nahi duten langileak ere bai. Jean Jacques Carriquiriborde, ODACE-ko buru berria izan da Euskal Irratietako gonbita, Goiz Berri saioan.
Baionako bestak desberdin pentsatu nahian, baionarren iritzia biltzea erabaki du Bihar Baiona oposizioko taldeak. Laurogehi pertsonek parte hartu dute bi tailerretan. Hortik atera proposamenetan da herritarrak besten komisioan barne hartzea, edota Baionako bestak auzo urrunduetara ere hedatzea. Orokorki Bihar Baionako hautetsiek, herritarren parte hartze eta gobernantza partekatze eskasa salatzen dute, herriko etxearen erabakietan.
Xiberoako bestetan eraso matxisten kontrako protokolo bat sortzeko xedea sortu da. Komite eta besta antolatzaile zenbaitek galdeginik, tailer bat eginen dute ostegun goizean Barkoxeko herriko salan. Helburua: besta batetan eraso bat gertatzen bada, biktima laguntzeko zer egin jakitea antolatzaileek.
Herrietako bozekin batera, Foru Aldundi edo diputazioetarako bozak ere iraganen dira Hego Euskal Herrian maiatzaren 28an. Gipuzkoa, Bizkaia eta Arabako Foru Aldundiek eskumen bereziak dituzte, horietan garrantzitsuena fiskalitatearena da, zergak edo legarrak biltzeko eskumena baitute. Foru Aldundiak probintzia bakoitzeko gobernuak baldin badira, batzar nagusiak probintzia bakoitzeko parlamentuak dira, eta 51 batzarkidez osatuak dira. Hauek dute hautatuko nork duen gobernua hartuko lurralde bakoitzean. Gipuzkoako Foru Aldundiko bi hautagai nagusienak izan dira gaur Euskal Irratietan. EAJko Eider Mendoza eta EH Bilduko Maialen Iriarte.
Herritarrak mobilizatzera deitzen ditu, Arberoa Lurra eta Etxebizitza kolektiboak. Donoztirin, 1.270.000 eurotan salgai ezarria izan da arraberritua izan den etxalde bat, hiru hektarea laborantza lurrekin batera. Etxebizitzen prezioen emendatzea salatzeko, ibilaldi bat antolatuko dute ostegun honetan. Gaur egun, bataz beste, 400.000 eurotan saltzen da 100 metro karratuko etxe bat Arberoan, hots, 2000 euro hilabetean 25 urtez. Horrez gain, beste etxe bat, 268.000 eurotan salgai ezarri dutela herrian, 4000 euro metro karratua. Donoztiriko etxeen %15 bigarren bizitegiak direla eta %10 etxebizitza hutsak.
Paul Urkijoren ‘Irati’ filmak izandako oihartzunaren harira erabaki dute lana berriro argitaratzea. Lau albumek osatzen dute obra, eta orain euskaraz ere osoki irakurtzen ahalko da. Joxean Muñoz eta Juan Luis Landak sortu zuten lan hau duela hiru hamarkada. Komikiak euskal mitologiaren iturritik edaten duen abentura-istorioa eskaintzen du.
Maurizia proiektua martxan da Baionan. Hamar gaztek, herriko etxearen esku den eraikin bat okupatzen dute maiatzaren 4tik. Baionako Santa Ursula karrikan da eta hiru estaiko egoitza hutsa da. Etxebizitzaren krisiak zuzenki hunkitzen dituen gazteak dira. Helburua dute ere gune horretan eskaintza kultural eta soziala proposatzeko. Jakin behar da herriko etxeak auzoa berregituratzeko proiektua duela, eta berriki kontzertazio bat martxan eman du. Gazteek, alokairu kontratua egitea proposatu diote herriko etxeari, eraikina hutsa izanen den bitartean erabili ahal izateko. Atzo arratsaldean polizia hurbildu zen bertara. Ezin izan dituzte gazteak kanporatu, okupatzaileek ez dutelako aterik hautsi eraikinera sartzeko. Halere, okupazioa egiaztatu, eta kanporatze prozedura legala abiatuko dute.
Iragan urteko Frantziako presondegien bilanak egoera hori utzi du agerian. Dominique Simonnot, txostenaren arduradunak azpimarratu du, kartzelak jendez gainezka direla, bere edukieraren %200eraino batzuetan. Gain populakuntza horri lotzen dizkiete baldintza oker gehienak, horri darion presoen arteko tentsioa, zaindari, janari eta arta eskasa. OIP Presondegien Behatokiko Maite Etcheverria Goiz Berri saioko gonbita izan da.
