AEKk antolatutako euskararen aldeko ekimen erraldoia 2026ko martxoaren 19tik 29ra egingo da. Atharratzen abiatuko da eta Bilbon amaituko, hamar gau eta hamaika eguneko ibilbidea eginez Euskal Herria punta batetik bestera.

Euskara gara

2026ko edizioaren mezua “Euskara gara” da. Antolatzaileen arabera, leloak gogorarazi nahi du euskara ez dela inorentzat muga, baizik eta arnasa eta elkargunea: zubi bat herritar guztien artean, jatorria, azal-kolorea edo euskararen ezagutza maila edozein dela ere. Korrikak, beraz, komunitate ireki eta anitza irudikatu nahi du, euskara oinarri duen bizikidetza eroso eta askea posible dela aldarrikatuz.

Errigora omendua

Edizio honek, gainera, omendu berezi bat izango du: Errigora. Nafarroako hegoaldean eta erdialdean euskararen alde egiten duen lan nekaezinak ekarri dio aitortza. AEKren esanetan, Errigorak euskaratik eta euskararentzat egiten duen ekarpena funtsezkoa da hizkuntza-eskubideak zabaltzeko eta euskalduntzea sustatzeko, bereziki euskara ofiziala ez den eremuetan. Korrikak omendu nahi du eguneroko lan isil hori, eta aldi berean, etorkizunera begira, babesa eta hauspoa eskaini.

Antolaketan lagundu nahi baduzue edo informazio gehiago behar baduzue, Korrikaren webgunean aurki dezakezue informazio osoa.