Angeluko Cantau lizeoko ikasle eta irakasleak eraikinetatik kanpo, ikastetxeko parkean izan dira goizeko bederatzietatik hamaikak arte, bonba abisu bat jaso ondotik. Segituan agertu da polizia bertara, eta eraikin guztiak husteko agindua eman du, baina lizeoa ebakuatzeko eskatu gabe. Horren ordez, ikastetxea konfinatu dute, eta geroztik nehor ezin izan da atera, ezta sartu ere. 11:00ak aldera, eraikin guztietan bilaketak egin eta deus ez atzeman ondotik, neurriak altxa ditu poliziak eta abisua faltsua zela ebatzi.

30 formakuntza inguru eskaintzen ditu Cantau lizeoak, profesionalak gehienak, eraikuntza eta eskulanetan berezitua baita. Orotara, 88 klasetan banaturik 1.850 ikasle daude Cantaun; formakuntza asko alternantzian garatzen direnez, litekeena da gaur ikasle gutiago izatea lizeoan bertan.