ARGIAk bere ondare grafikoaren zati handi bat herritarren eskura jarri du: 100.000 argazki baino gehiago bildu ditu Fototeka digitalean, lizentzia librean erabilgarri. 1960ko hamarkadatik gaur egunera arteko irudiak aurki daitezke bertan, Euskal Herriko historia hurbila dokumentatzen dutenak: manifestazioak, kultur ekitaldiak eta pertsonaia ezagunen erretratuak, besteak beste.

Irudi guztiak kalitate handian deskarga daitezke, eta Creative Commons lizentzien bidez partekatzen dira; hau da, egilea aitortuz gero berrerabili daitezke. ARGIAren arabera, proiektua irekia da eta etengabe elikatzen jarraitzeko asmoa du, herritarren ekarpenak ere jasoz. Hala azaldu digu Jon Torner ARGIAko Fototekako langileak: «Herri ondarea da, eta herriaren esku utzi behar genuela pentsatu dugu». Dena ikusgai da ARGIAko Fototekaren webgunean.