Aldaketarik ez da ageri Hiriburun

2001etik auzapez da Alain Iriart EH BAIko kidea. Itxura guzien arabera laster jakinarazi behar luke bosgarren kargualdi baten eramateko prest litzatekeela.

Mugerren, Roland Hirigoien ez da auzapez izanen bainan aurkeztuko da

2001etik auzapez da Mugerren Roland Hirigoien ere. Baina ez da zerrendaburu izanen. Hala ere Fabienne Hirigoien bere auzapezordeak zuzendu listaren hautagai izanen da Roland Hirigoien trantsizioa bermatzeko, azaldu duen bezala.

Lehuntzen, David Hugla kontseilutik aterako da osagarriak beharturik

David Hugla Lehuntzeko auzapez da 2020az geroz. Pierre Guillemotoniaren segida hartu zuen baina ez dela berriz aurkeztuko aitortu digu 2023an pairatu bihotzeko arazoengatik. Martine Péré lehen auzapezordeak du lekukoa hartuko gehiengoaren lista gidatzeko.

Urketa, Milafranga eta Ahurtiko auzapezak berriz aurkeztuko dira

2020tik auzapez diren Ahurtiko Nathalie Martial-Etxegorri, Milafrangako Marc Saint-Esteven eta Urketako Raymond Darricarrère segitzeko prest agertzen dira.

Lista bakarra agertzen da mementoan herri bakoitzean

Ez da beste zerrendarik agertzen Errobi-Aturriko herrietan mementoko. Azpimarratu behar da RN alderdiak emaitza onak erdietsi zituela eremu horretan aitzineko hauteskundeen karietara, izan Frantziako lehendakaritzarako, departamendurako edo legebiltzarrerako bozen karietara. Baina eskuin muturrak ez du deus jakinarazi orain arte.