Beskoitzeko kartingeko aparkalekua hustuko da gaurtik goiti. Abenduaren 26 honetan, Coordination Rurale sindikatuak Beskoitzeko A64 autobidearen blokatzea utziko du.

Eguerditan ofizialki uzteko erabakia hartu dute, sindikatuko ordezkariek. Abenduaren 12an hasi ziren mobilizatzen, Dermatosi Nodular Kutsakorra behien eritasunaren kontrako protokoloaren salatzeko. Zerbitzu sanitarioek beste departamenduetan egin dituzten tropa oso batzuen hilketa ez dituzte onartzen laborariek. Bi asteko mobilizazioaren ondotik, hilketa orokorrak ez ditu protokolotik kendu gobernuak. Bilkura franko izan dira, eta ostiral goiz honetan, prefetarekin bilkura dute CRekoek. Berriz ere dispositibo horren kentzea galdeginen dute.

Nahiz eta ez duten helburu nagusia bete, blokatzea bertan behera utziko dute. Akidura eta hotza sendi dira urte hondar honetan. ELB sindikatuak jadanik pausa baten hartzeko erabakia hartu zuen duela zonbait egun.

Anartean, txertatze kanpainak segitzen du aitzina, eta prefeturaren arabera departamenduko behien herena txertatua izan da.