Orain arte Herri Berri izenarekin ezaguna zen taldea beste izen batekin ariko da oraingo hauteskundeetan: Donibanen Bizi, Pascal Lafitte abertzale eta eskola-zuzendari ohia zerrendaburu dutela.

Taldeak azaldu du izen-aldaketa %60an berritua den taldearekin batera datorrela. Zerrenda idekia dela nabarmendu dute, balore aurrerakoi, ekologista eta ezker abertzalekoetan oinarritua, eta interesa duten guztiei parte hartzeko deia egin diete.
Haien burua eskuinen alternatiba gisa aurkezten dute, "alderdietatik aske", nahiz eta jatorri ezberdinetako jendea bildu: abertzaleak, sozialistak, komunistak eta ekologista alderdietako kideak, besteak beste.

Oraindik programa zehaztua aurkeztu ez badute ere, argi utzi dute etxebizitza izanen dela haien ardatz nagusia. Bereziki, bigarren etxebizitzen arazoa jarri dute mahai gainean. Donibane-Lohitzunen bigarren etxebizitzen tasa %45ekoa dela gogorarazi du Pascal Laffite Donibanen Bizi-ko zerrendaburuak. Egoera “jasanezina” taldearentzat.

Momentuz, beraz, 3 zerrenda dira lehian Donibane Lohitzunen: Donibanen Bizi ezkertiarrak, Jean-François Irigoyen oraingo auzapeza eta Manuel De Lara zentrista.