Txingudiko Badiako urpeko lohiak kentzeko lanak abiatu dituzte, lehen fase honetan Hendaiako kirol portuan zentraturik. Aurten 35.000 metro kubo sedimentu inguru ateratzea dute helburu, portuko hondoa garbitzeko asmoz. Hurrengo urtean, berriz, Hendaiako itsasadarrean egingo dituzte lanak, baina Hondarribiko aldean ez da jarduketarik aurreikusi, egutegi eta aurrekontu kontuak direla medio.

Fort Boyard izeneko itsasontzia lanean hasi da dagoeneko, garabiaren pala uraren azpian murgilduz eta hondoan pilatutako lohiak jasotzen. Irudi hori, apirilaren 1ean ikusgai izan da, urte luzez atzeratutako lan baten hasiera irudikatuz. Izan ere, bederatzi urteko zainaldiaren ondoren, Hendaiako portuan eta Txingudiko badiako inguruan dragatze proiektua martxan jarri dute, Charente departamenduko Itsas Zerbitzuek bultzatuta.

Hendaiako kirol portua eraiki zenetik, duela 32 urte, ez da portuko hondoaren garbiketarik egin. Urteen poderioz, hondarra, lokatza eta bestelako sedimentuak pilatzen joan dira, nabigaziorako arazoak sortuz. Hori dela eta, datozen hiru urteetan, udaberriro bi hilabeteko epean, dragatze lanak egingo dituzte Fort Boyard eta Trézence ontziek.

Egitasmo hau Hendaiako Udala eta Pirinio Atlantikoetako Departamenduko Kontseiluak sustatzen dute, portuaren kudeaketaren arduradunak direlako. Iker Elizalde Hendaiako zinegotziaren hitzetan, “oso beharrezkoa da dragatze lan hauek egitea, portuko erabiltzaile askorentzat eta jarduera ekonomikoarentzat. Portuan dabiltzan ontziak, baita Hondarribiko linea egiten duen ontzia ere, zailtasunak dituzte sedimentuengatik.”

Epe luzeko proiektua
Hasierako lan hauek martxan jarri badira ere, dragatze proiektua hamar urtez luzatuko da. Egutegia eta finantzaketa kontuak direla eta, Frantziako aldeko lanak bakarrik sartuko dira planifikazioan, eta Espainiako aldea, oraingoz, kanpoan geratuko da.