Atzoko EEPren Biltzar Nagusiak ez ditu bazterrak lasaitu. Gaur eguerdian Euskal Konfederazioak hedatu duen prentsa ohar batean argi utzi du aurrekontu berriari buruz egiten duen irakurketa: "Ez da aski!".

2023an EEPko zerbitzuek egin zuten azterketak azaldu zuen 2,6 milioi euro gehiago behar dituela erakundeak lana behar bezala egiteko; behar denaren %16 bertzerik ez dute lortu. Euskal Hirigune Elkargoa ez bertze hiru bazkideekiko kritiko mintzatu da Konfederazioa: "Beste behin erakutsi dute ele ederretatik harago ez dutela den mendreneko urratsik egiteko asmorik".

"Peko errekarako bidean"

Konfederazioak oroitarazi du EEPk iaz 2050era begirako bide-orria aurkeztu zuela, zeinetan ordurako Ipar Euskal Herriko biztanleen %30 euskalduna izatea nahi duen. Horretarako, haatik, baliabideak behar dira, eta atzo bertan Maider Behotegi lehendakariak onartu zuen aurrekontu berriak ez duela halako helbururik ahalbidetuko. Eta datuekin jarraitu du Euskal Konfederazioak: 2004an, EEP sortu zenean, Ipar Euskal Herriko lau biztanletik bat euskalduna zen, orain berriz, bostetik bat besterik ez da. Euskara "peko errekarako bidean" dela ohartarazi dute.