Finalerdietako hiru saioak, Gure Irratia, Irulegiko Irratia eta Xiberoko Botza irratiek antolaturik, aldi berean eginen dira Lapurdin, Baxenabarren eta Xiberoan. Publikoa gonbidatua da Armendaritzeko Zuentzat gelara (Baxe Nafarroa), Larresoroko herriko gelara (Lapurdi) eta Barkoxeko arrabotira (Xiberoa), eskualde bakoitzeko biharko kantariak ezagutzeko. Txapelketa hiru kategoriatan banatua da: bakarlariak, bikoteak eta taldeak; horiez gain, publikoaren saria eta sari bereziak ere banatuko dira.

Txapelketan 6 eta 15 urte arteko haurrek hartzen dute parte, bi kategoriatan banaturik: haurtxoak (6-11 urte) eta gaztetxoak (12-15 urte).

Ehun bat gazte kantari igurikatzen dira aurten. Parte-hartzaile guziek sari bat ukanen dute, beren parte-hartzea sariztatzeko.

Lapurdiko saioan 150 bat kantarik hartuko dute parte. Goizeko 11:00etan 12-15 urtekoen saioa iraganen da, eta arratsaldeko 15:00etan 6-11 urtekoena. Orotara 30 kantu aurkeztuko dira: 13 bakarlari, 11 bikote eta 6 talde entzunen dira.

Baxe Nafarroako saioan 130 bat kantari bilduko dira. 10:30etan hasiko da 6-11 urtekoen saioa, eta 15:30etan 12-15 urtekoena. Orotara 27 kantu entzunen dira: 12 bakarlari, 9 bikote eta 6 talde.

Xiberoko saioan, berriz, 200 bat kantari igurikatzen dira. Saioa 15:00etan hasiko da, eta orotara 20 kantu aurkeztuko dira: 3 bakarlari, 2 bikote eta 15 talde.

Partaideen lanak neurtu eta baloratuko dituzten epaimahaiak hainbat kantarik osatuko dituzte.

Finala ekainaren 6an, larunbatez, Altzai-Altzabeheti-Zunharretan izanen da, eta adin-talde bakoitzeko 25 onenak bilduko dira han.

1987an sortu zen Haur Kantu Txapelketa, eta urteekin ospe handia erdietsi du, etorkizuneko kantariak agerian jartzen dituelako. Haur eta gazte anitzentzat, lehiaketa hau da oholtzarekin duten lehen harremana, publiko zabal baten aitzinean kantatzeko aukera eskainiz.

Txapelketa euskaraz kantatutako musika-estilo guziei irekia da. Parte-hartzaile batzuek, ekitaldirako sortutako kantu berriak aurkezten dituzte.