Herriko bozen bigarren itzulia iraganen da bihar Ipar Euskal Herrian. 158 herrietatik hamaikatan ez da gehiengorik atera lehen itzulian, eta, ondorioz, igandean erabakiko da nor izanen den auzapez Hendaian, Urruñan, Donibane Lohizunen, Azkainen, Arbonan, Kanbon, Beskoitzen, Baionan, Miarritzen, Maulen eta Bokalen.Orotara, egoera anitza da herriz herri. Gehienetan, triangularrak nagusitzen dira: zortzi herritan hiru zerrendaren arteko lehia izanen da. Bi herritan lau zerrendako egoera konplexuagoa izanen da, eta bakarrean, Arbonan, bi zerrendaren arteko duelu zuzena.

Arbonan, Guillaume Fourquet eta Beñat Arla ariko dira buruz buru bigarren itzulian. Jacqueline Peigneguyren zerrenda hirugarren gelditu zen lehen itzulian, eta erretiratzea erabaki du, lehia bi hautagairen artekoa utziz.

Bestalde, triangularrak izanen dira Hendaian, Urruñan, Donibane Lohizunen, Azkainen, Kanbon, Beskoitzen eta Maulen, eta horietan botoen banaketa erabakigarria izan daiteke emaitzan.
Hiri handienetan ere mugimenduak izan dira bi itzulien artean. Miarritzen, azkenean, hiru zerrenda gelditu dira: Jean-Baptiste Dussaussois-Larralde Serge Blancoren taldearekin elkartu da, eta Ana Ezcurraren eta Guillaume Barucqen zerrendek bat egin dute; Maider Arosteguyk, berriz, ez du aliantzarik egin.
Baionan ere hiru zerrenda izanen dira lehian: Jean-Claude Iriartek eta Henri Etchetok bat egin dute ezkerreko indarrak bateratzeko, Iriart zerrendaburu dutela. Haien aurrean izanen dira Jean-René Etchegaray oraingo auzapeza eta Pascal Lesselier eskuin muturreko hautagaia.

Azkenik, Bokalen lau zerrenda izanen dira lehian: Mathieu Horn, Guy Boulanger, Francis Gonzalez eta Hélène Etxenike.