Ipar Euskal Herriko Hazkurri Bankuak maiatzaren 29an eta 30ean antolatutako bilketa bereziaren bidez 8 tona higiene-produktu bildu ditu aurten, iaz baino %25 gehiago. Ekimenaren helburua prekaritate higienikoaren aurka borrokatzea izan da, bereziki hilekoaren prekaritatearen aurka.

Filgi Claverie Michelena Hazkurri Bankuko kideak azpimarratu duen bezala, prekaritate higienikoak gero eta pertsona gehiagori eragiten dio Frantzian: hirutik batek higiene-produktuen kontsumoa mugatzen du baliabide ekonomiko nahikorik ez duelako. Egoera horren barruan, hilekoaren prekaritatea da kezka handienetako bat, emakume askok oinarrizko babes higienikoak erostearen eta bestelako beharrei erantzutearen artean aukeratu behar izaten baitute.

Kanpainan bildutako produktuen artean daude babes higienikoak, tanpoiak, konpresak, xanpua, hortzetako pasta, dutxarako gela, xaboiak eta haurrentzako pixoihalak. Material horiek guztiek eguneroko higienea bermatzen lagunduko dute egoera zaurgarrian dauden pertsonentzat. Bildutako produktu guztiak Hazkurri Bankuarekin lanean ari diren 41 elkarteren eta GEUZen artean banatuko dituzte datozen asteetan. Horrela, erakundeak laguntza zuzena emanen die prekaritate egoeran dauden milaka pertsonari, oinarrizko higiene-produktuak eskuratzeko zailtasunak arinduz.