Aste hastapenetik Frantzia mailan sortu den ikasleen mugimendua Ipar Euskal Herrira hedatu zen atzo, eta gaur gutienez dozena erdi lizeo blokatuak dira Lapurdin. Ikas-baldintza txarrak salatzen dituzte orohar, eta lizeo bakoitzak bere aldarrikapen zehatzak ditu; Angeluko Cantaun, adibidez, irakasle, erizain eta langile lanpostuen kentzea salatzen dute, baita soldata apalegiak, ikasle sobera geletan, ikasleen prekaritatea, edota bastimenduen zahartasuna. "Erreusitzeak ez luke gure ongizatea kaltetu behar” idatzi dute. Baionako Etxepare lizeoan, euskaraz ikasi eta bizitzeko eskubidea ari dira aldarrikatzen.

Baionan, goizeko hamarretan manifestaldia deitu dute hainbat ikasle kolektibok gaur, IAS Ikasle Antolakunde Sozialistak barne. Roland Barthes plazatik abiatuko dira, eta blokatze ugariko ikasleak bertan batuko dira. Etxepare lizeoan, egun osoko egitaraua prest dute ikasle asanbladakoek. Atzo, Paul Bert lizeoko ikasleek blokatzean hainbat zikinontziri su eman zieten, eta gutienez ikasle bat atxilotu zuen poliziak. Gaur goizean lizeo berean bertze atxiloketa bat izan dela salatu dute sareetan, eta Ici Pays Basque irratiko lankideek jakinarazi dutenez, poliziak gas negar eragilea erabili du lizeo berean, protestan diren ikasleak lekutzeko.

"Frantsesak ez izan arren, frantziar hezkuntza sisteman murgilduak garelako"

Manifestu bat irakurri dute 10:00etan Etxepare lizeoko ikasleek, gaurko ekintzaren arrazoiak zerrendatuz: irakasle eta langileen lan baldintzen okertzea eta postuen galera, Seaskaren finantzaketa eskasa, haien hitzetan "euskaraz ikastea elite bati mugatzen" diona edo baxoa euskaraz pasatzeko ezintasuna. Gainera, sostengua erakutsi diete azken egunetan Baionan zein Frantzian lizeoak blokatzeagatik "errepresio poliziala jasan dutenei", eta haiek "frantsesak ez izan arren", mobilizatzeko beharra zela erabaki du Etxepareko ikasle asanbladak, "frantziar hezkuntza sisteman" garatzen dutelako ikasketa prozesua.

Hain zuzen ere, IGPN poliziaren ikuskaritzak hiru bortizkeria polizial kasu ikerketapean ditu, astelehenean eta atzo poliziak larri zauritutako ikasleena. Tours hirian, ikasle batek begi batean zauri larriak jasan ditu, eta prokuradoreak LBD tiro batekin bateragarria dela argitu du.