Heletako Agour, Bardozeko Bastidarra, Hazparneko ELM, Makeako Elkarlan, Donibane Lohitzuneko Betiko, Jatsuko SOMOCAP, Bidarteko Voltaire, Angeluko IGC eta Baionako SOGECA: bederatzi enpresa horiek dute osatzen «Lan eta bizi herrian» izeneko SCIa. Iaz, bi proiektu muntatu zituzten, hamar bat etxebizitzaren proposatzeko. Etxebizitza krisiak enpresengan eragin handia duela azaldu du Agourreko buru Peio Etxelekuk, eta enpresaburuek arrapostu hau pentsatu zuten duela lau urte.

Lehen proiektua Hazparnen dute beraz bururatu. Bidegarai Berria izeneko etxea erosi zuten iaz, eta ANAH estatuko zerbitzuen diru laguntzari esker berritu dute. Uda honetatik, horien enpresetako lau langile dira hor bizi.

Fanny Young SOMOCAP enpresako langilea da, eta SCIaren aprtamendu bat alokatzen du buruiletik: T3 bat 510€tan. Lanpostutik hurbilago bizitzeak abantaila anitz dituela erran du. Bere etxearen jabea eta nagusia pertsona bera dira, baina ez du beldurrik, enpresaren "alde humanoa" dela-eta.

Hazparnekoa egin eta, Aiherrako Auxotea dute orain ondoko etapa enpresaburuek. Hor, zazpi etxebizitza nahiko lituzkete proposatu. Peio Etxelekuk erran digunez, ez dute lehengo Auxotea jatetxearen segidarako nehor atzeman, eta jatetxearen tokian apartamenduak eginen dituztela orain. Horren finantzatzeko, bide bazterrean den etxearen saltzea aitzin ikusten dute.

Orotara, bi proiektuen artean, 2 milioi eta erdi euroko buxeta da. Enpresaburuek azpimarratu digute ere ondoko urteetan landuko dutela salmentaren gaia Etxalderekin, langileek gozamena erosteko parada ukan dezaten, baina espekulazioa saihestuz.