Gogor jo du barda Nils ekaitzak Ipar Euskal Herria. Tenpestaren gailurra 4:00ak aldera izan da, eta atzo arratsean alerta laranja eman zuen Pirinio Atlantikoetako prefekturak, gaur goizean maila horira apaldu duelarik.

Oraindik ere, goizean zehar 95 kilometro ordura arte joan daitezkeen ufadak iragartzen ditu Météo Francek kostaldean, 70 kilometro ordukoak barnekaldean.

Atzo arratsean Hendaia-Akize, Hendaia-Bordale eta Baiona-Donibane Garazi burdinbide lineetan trafikoa bertan behera utzi zuen SNCFk segurtasunez. Lehen bi lineetan gutienez gaurko 15:00ak arte ez da trafikoa itzuliko, Baiona-Donibane Garazi linean bihar goizera arte bederen ez da trenik ibiliko.

Gauean eta goizean zehar suhiltzaileek eta departamenduko bideen zerbitzuek gutienez 350 interbentzio egin dituzte. Hala, artikulu hau idazteko tenorerako bide gehienak garbituak dira, baina oraindik ere kasu egiteko oharra zabaldu dute errepidean.

Goizean zehar, Ipar Euskal Herri osoan traba ugari ziren errepidean. Bertzeak bertze, puntu hauetan:

• Maule eta Ospitalepea arteko bidean

• D2 bidean Mitikile eta Nabarrenkoxe artean

• Amenduzen, Hiriberrin

• D14 bidean, Garrüze eta Donoztiri artean

• D8 bidean, Bithiriñatik Iholdira artean

• D22an, Heleta eta Irisarri artean

• Heleta eta Luhuso arteko bidean

• D18an, Donazaharretik Iratiko bidean

• Kanbon, Ursuiako bidean, D410ean

• Senpere eta Zuraide arteko bidean

• Senperen, Ahetzeko bidean