ErrobiL heren-gune sozialaren estreinaldia ospatuko da larunbat honetan Itsasun. Materialaren berrerabiltegi solidarioa eta konpontze tailer soziala ireki zuen Aiba elkarteak joan den urtarrilean lehengo La Nive arta zentroan. Etxetresna elektriko edo xintxuketa materiala han utz daitezke eta bertako teknikariek ikusten dute berrerabilgarri direnez behardun bati prezio apalean saltzeko. Horrez gain, edonor tailerrera joan daiteke bere materiala konpontzeko, teknikarien kontseiluei esker elkarteari kidetuz. Estreinaldia larunbat goizean egin dute. Gune berriaren bestan horretan, bisita gidatua, ekitaldi ofiziala eta animazioak lerrokatuko dira.
Azpiegitura berriak Eiheralarren apalkuntza demografikoari arrapostua emateko. Joan den ebiakoitzean, herritar eta hautetsiak Eiheralarreko karriketan gaindi ibili ziren herrian egin obren estreinaldiaren kari. Departamenduko kontseilua eta Euskal Hirigune Elkargoaren laguntzari esker, karrika berri bat, sei etxebizitza sozial, ur araztegi berria, eta josta leku bat eraiki dituzte herrian. Proiektuaren jatorrian arrangura bat, 700 biztanleko galera joan den mendean. Hau dela eta, herritarren atxikitzeko xedearekin, herriko etxeak bere zentroa gararaztea erabaki du. Lehen obra horien ondotik, Pascal Iribarne auzapezak garapena segitzeko xedea adierazi du. Bizikleta ibilbide bat eta jarduera ekonomiko eremu bat proiektuetan dira jadanik.
Euskal Herrian Euskaraz eta Baionako Etxepare lizeoko Terminaleko ikasleak bildu dira ostiral huntan Euskal Hirigune Elkargoko lehendakariarekin. Euskararen kontrako egoera bidegabeak publikoki salatzea galdegiten diete Euskal Herriko hautetsiei. Jean-René Etxegarai Euskal Hirigune Elkargoko lehendakaria, Antton Kurutxarri Hizkuntza lehendakari ordea eta hizkuntza arduradunekin elkartu dira EHE Euskal Herrian Euskaraz eta Baionako Etxepare lizeoko Terminaleko ikasleak ostiral huntan Baionako Elkargoaren egoitzan. Euskal Herriko hautetsiei galdetzen diete salatzea herritarrek epaiketetan ez deklaratu ahal izaitea. Ikasleek azterketak euskaraz ez pasa ahal izaitea. Eta Euskal Herriko herrien euskal izenak ez ofizialak izaitea. Hori lehentasunez eta bigarren jauzi gisa, kulturan euskal kulturari lehentasuna emaitea galdetzen diete ere eta euskara ikasi nahi duten heldu guziek euskarazko kurtsoak kitorik hartu ahal izaiteko baldintzak sortzea.
Kanboko Marieniako lurren defenditzeko landatze egunak arrakasta erdietsi zuen larunbatean. Bostehun pertsona bildu ziren lur hauetan, makila eskuan. Makila horiek «irabazia izanen den bataila baten berme» gisa izendatu zituzten hitzartzean. Lur sagarrak, piper eztia eta kuiak landatu zituzten hektarea bat eta erdiko lur batean. Ondotik auzolanari esker zainduko dituzte barazki hauek. Sinbolo azkarretik haratago, laborantzako lurrak defendatzen dituzten militanteek erakutsi nahi izan dute Marieniak hazkurri lurrak direla. Auzitegian, Euskal Hirigune Elkargoko abokatuak erran zuen ez bezala. Marieniako lurrez gain, beste borrokak batu dira larunbateko egunera. Baztango Aroztegia proiektuaren kontrako kideak hor ziren baita Biarnon E-CHO deskarbonizazio xedearen kontrako CADE elkartekoak ere. Bouygues Immobilier promotorearen proiektua salatzeagatik hiru militanteren kontrako auzia oroitarazi dute, irailaren 9an, Kanboko kontseiluan egindako protesta baten harira. Bestalde joan den astean, 2022an Bouyguesen maketa bat lurrez estaltzeagatik zorrozkiago kondenatu diren militanteen sostenguz kutxa bat ireki du Ostia sareak.
Hamar egunez pantailak itzaltzeko desafioa abiatu da. Maiatzaren 22a arte ’10 egun pantailarik gabe’ erronka gainditzen saiatuko dira ipar euskal herriko 2.445 haur. Aurten 25 ikastetxek segitu dute mugimendua. Astearte honetan hasi da erronka, 10 egunez telebistarik, tabletarik edo bideo jokorik gabe bizitzen ikasiko dute haurrek. Bidarteko Uhabia ikastolan 10 eta 11 urte arteko haurrek serioski hartzen dute desafioa, baina ez da beti erresa. "Pantailak asko begiratzen ditut, joko bideotan ari naiz eta Youtube begiratzen dut" erran digu Uhainak. Desafioaren garaian, pantailen ordez marraztu, irakurri edo familian mementoak pasatzeko aukera dela erran digu ere. Ikastolatik abiatzen da xedea baina etxean gurasoek ere badute zeregina pantailen kudeaketan. Kattalin Duhalde Uhabia ikastolako zuzendariak erran digu desafio handiena etxean dutela haurrek. Erronka segitzeko, haur bakoitzak liburuxka batean zehazki idatzi behar du zenbat kontsumitzen dituen pantailak egunez egun. 10 egun pantailarik gabe mugimendua sustatzen duen elkarte bat sortu zen Ipar Euskal Herrian, horren kudeatzailea da Eneko Jorajuria. Pantailen eragin ezkorra gaur egun frogatua dela erran digu "Zientifikoki erakutsia da. Eragina badu osagarrian, sedentario izatea, aktibitate fisiko gutiago, loa ere kaltetua da, ikusmena, eta beraz badugu zerbait egiteko gizarte mailan". Desafioaren ondotik, haurren eta gurasoen usaiak aldatzea espero da.
